പട്ന: കേരള രാഷ്ട്രീയത്തെ പിടിച്ചു കുലുക്കിയ മുൻ മന്ത്രി എം എം മണിയുടെ വിവാദമായ ‘വൺ, ടൂ, ത്രീ’ പ്രസംഗത്തിനു സമാനമായി ബീഹാർ എംഎൽഎ അനന്ത് സിംഗ് നടത്തിയ പ്രസംഗം വലിയ രാഷ്ട്രീയ വിവാദമാകുന്നു. മുൻ മുഖ്യമന്ത്രി നിതീഷ് കുമാറിനൊപ്പം പ്രവർത്തിക്കുമ്പോൾ താൻ “9 പേരെ കൊലപ്പെടുത്തിയിട്ടുണ്ട്” എന്നായിരുന്നു വെള്ളിയാഴ്ച ജെഡിയുവിന്റെ മോകമ എംഎൽഎ അനന്ത് സിംഗ് ഒരു പ്രസംഗത്തിൽ പറഞ്ഞത്. എന്നാൽ പാർട്ടിക്കുള്ളിൽ നിന്നും പ്രതിപക്ഷത്തുനിന്നും വലിയ വിമർശനങ്ങൾ ഉയർന്നതിനെത്തുടർന്ന് അദ്ദേഹം പിന്നീട് ഈ പ്രസ്താവന തിരുത്തി.
പട്ന ഗ്രാജുവേറ്റ്സ് എംഎൽസി തിരഞ്ഞെടുപ്പുമായി ബന്ധപ്പെട്ട രാഷ്ട്രീയ ഭിന്നതകൾക്കിടയിലാണ് ആറാം തവണയും എംഎൽഎയായ അനന്ത് സിംഗ് ഈ പരാമർശം നടത്തിയത്. ജെഡിയു സ്ഥാനാർത്ഥി നീരജ് കുമാറിനെതിരെ പ്രശാന്ത് കിഷോറിന്റെ സ്ഥാനാർത്ഥിയെയാണ് അനന്ത് സിംഗ് പിന്തുണയ്ക്കുന്നത്.
"ഞാൻ ചെയ്തതുപോലെ ആരെങ്കിലും ഇത്രയധികം ത്യാഗങ്ങൾ ചെയ്തിട്ടുണ്ടോ? അന്ന് നിതീഷ് കുമാർ ഒന്നുമല്ലായിരുന്നു, അദ്ദേഹം ഇവിടെയും അവിടെയുമൊക്കെയായി നടക്കുകയായിരുന്നു. ആ സമയത്ത് നിതീഷ് കുമാറിനൊപ്പം നിന്നുകൊണ്ട് ഞാൻ ഒമ്പതു പേരെ കൊലപ്പെടുത്തിയിട്ടുണ്ട്," എന്നാണ് മാധ്യമപ്രവർത്തകരോട് അദ്ദേഹം പറഞ്ഞത്.
ഈ പ്രസ്താവനയുടെ വീഡിയോ സാമൂഹിക മാധ്യമങ്ങളിൽ വൈറലായതോടെ, അനന്ത് സിംഗ് പിന്നീട് വിശദീകരണവുമായി രംഗത്തെത്തി. “ലാലു പ്രസാദിന്റെ ഭരണകാലത്ത് എന്റെ ഒപ്പമുണ്ടായിരുന്ന ഒമ്പത് പേർ കൊല്ലപ്പെടുകയും എനിക്ക് തന്നെ വെടിയേൽക്കുകയും ചെയ്തിട്ടുണ്ട്. ഞങ്ങൾ നിതീഷ് കുമാറിനൊപ്പം ചേർന്നതുകൊണ്ടാണ് ലാലു അവരെ കൊലപ്പെടുത്തിയത്. ഞങ്ങൾ അത്തരം വലിയ നഷ്ടങ്ങൾ അനുഭവിച്ചിട്ടുണ്ട്. ഹൃദയാഘാതം മൂലമാണ് എന്റെ പിതാവും മരണപ്പെട്ടത്,” എന്ന് അദ്ദേഹം വ്യക്തമാക്കി. ഈ പ്രസ്താവനയെ തുടർന്ന് രാഷ്ട്രീയ രംഗത്ത് വലിയ കോലാഹലമുണ്ടായി. മുഖ്യമന്ത്രി നിതീഷ് കുമാറിനോട് ആർജെഡി വിശദീകരണം ആവശ്യപ്പെട്ടു.
കേരളത്തിൽ മുൻ മന്ത്രിയും സിപിഎം നേതാവുമായ എം എം മണി സമാനമായ വിവാദ പ്രസ്താവന നടത്തിയിരുന്നു. 2012 മെയ് 25-ന് ഇടുക്കി ജില്ലയിലെ തൊടുപുഴ മണക്കാട് വെച്ച് നടന്ന ഒരു പൊതുയോഗത്തിലായിരുന്നു ഇത്. “പട്ടിക തയ്യാറാക്കി രാഷ്ട്രീയ പ്രതിയോഗികളെ വകവരുത്തിയും കൈകാര്യം ചെയ്തുമുള്ള പാരമ്പര്യം സിപിഎമ്മിനുണ്ട്... ശാന്തൻപാറയിൽ അക്കാലത്ത് ഞങ്ങൾ 13 പേരുടെ ഒരു പട്ടിക തയ്യാറാക്കി. വൺ, ടൂ, ത്രീ... അതിൽ ആദ്യത്തെ മൂന്നുപേരെ ഞങ്ങൾ കൊന്നു. ഒരാളെ വെടിവെച്ചുകൊന്നു, രണ്ടാമത്തവനെ തല്ലിക്കൊന്നു, മൂന്നാമനെ കുത്തിക്കൊന്നു,” എന്നായിരുന്നു മണി പറഞ്ഞത്. തുടർന്ന് അദ്ദേഹത്തിന് നിയമ നടപടികൾ നേരിടേണ്ടിവന്നു.
