മൂവാറ്റുപുഴ: ബാങ്ക് അക്കൗണ്ടുകളില് മിനിമം ബാലന്സ് വേണമെന്ന നിയമം കര്ശനമാക്കിയതോടെ നിര്ധന ക്ഷേമപെന്ഷന് ഗുണഭോക്താക്കള് വെട്ടിലായി. ക്ഷേമപെന്ഷന് ബാങ്ക് അക്കൗണ്ടിലൂടെ ലഭിക്കുന്ന ലക്ഷക്കണക്കിനു ഉപയോക്താക്കള്ക്കാണു ഇതു തിരിച്ചടിയാകുന്നത്. തുച്ഛമായ തുകയാണു സര്ക്കാര് ക്ഷേമപെന്ഷനായി വിതരണം ചെയ്യുന്നത്.
750 മുതല് 1,500 രൂപവരെയാണു വിവിധ ക്ഷേമപെന്ഷനുകള്ക്കുള്ള സര്ക്കാര് നല്കുന്ന തുക. അതേസമയം, മെട്രോ നഗരങ്ങളില് 5,000, നഗരങ്ങളില് 3,000, അര്ധനഗരങ്ങളില് 2,000, ഗ്രാമീണ മേഖലയില് 1,000 എന്നിങ്ങനെ തുക അക്കൗണ്ടുകളില് മിനിമം ബാലന്സ് വേണമെന്ന നിബന്ധന ഏപ്രില് ഒന്നുമുതലാണു ബാങ്കുകള് പ്രാബല്യത്തിലാക്കിയത്. ഏറ്റവുംകൂടിയ ക്ഷേമപെന്ഷന് തുകയുടെ മൂന്നുഗുണിതമെങ്കിലും ഉണ്ടെങ്കിലേ മെട്രോ നഗരങ്ങളിലെ ബാങ്ക് മിനിമം ബാലന്സ് തുകയ്ക്കൊപ്പം വരികയുള്ളൂ. ഗ്രാമീണ, അര്ധനഗര വിഭാഗങ്ങളില്പ്പെടുന്ന മേഖലകളിലാണു ക്ഷേമപെന്ഷന് വിഭാഗത്തില്പ്പെടുന്നവര് ഏറിയപങ്കുമുള്ളത്.
ഇവിടങ്ങളില് യഥാക്രമം 2,000, 1,000 രൂപ എന്നിങ്ങനെ തുകയുണ്ടെങ്കിലേ ബാങ്ക് അക്കൗണ്ട് നിലനിന്നുപോരുകയുള്ളൂ. ക്ഷേമപെന്ഷന് അക്കൗണ്ടുകളില്വരുന്ന തുക നിക്ഷേപമായി സൂക്ഷിക്കാതെ അപ്പപ്പോള് പിന്വലിക്കുകയാണു പൊതുവേ ഇടപാടുകാര് ചെയ്യാറുള്ളത്. എന്നാല്, മിനിമം ബാലന്സ് നിലനില്ക്കണമെങ്കില് അക്കൗണ്ടുകളില് പണം സൂക്ഷിക്കാതെ പറ്റില്ലെന്ന നിലവരുന്നത് സാധാരണക്കാരും നിര്ധനരുമായ ക്ഷേമപെന്ഷന് ഗുണഭോക്താക്കള്ക്കു തിരിച്ചടിയാകും.
അക്കൗണ്ടുകളില് മിനിമം ബാലന്സ് ഇല്ലെങ്കില് 200 രൂപയോളം (മിനിമം ബാലന്സ് ഇല്ലാത്ത കാലയളവ് കണക്കാക്കി ഈ തുകയില് മാറ്റം വരും) പിഴയും നല്കേണ്ടിവരും. പിഴയ്ക്കു പുറമേ സര്ചാര്ജും ഏര്പ്പെടുത്തും. ആറുമാസം കാലയളവ് കണക്കാക്കിക്കൊണ്ടാകും പിഴവരികയെന്നാണു ബാങ്കുകള് നല്കുന്ന സൂചന. ക്ഷേമപെന്ഷന് തുകയില് ഒരുഭാഗം മിനിമം ബാലന്സായി സൂക്ഷിക്കേണ്ട ഗതികേടിലാണു വയോധികരായ ഈ അവശവിഭാഗം.
