പാലക്കാട്: ഒരു കോടി രൂപയുടെ നിരോധിച്ച കറന്സി നോട്ടുകള് ടൗണ് നോര്ത്ത് പോലീസ് പിടികൂടി. സംഭവത്തില് നാലുപേരെ അറസ്റ്റ് ചെയ്തു. പൊള്ളാച്ചി തെപ്പകുള്ളം സ്വദേശി രാജാമുഹമ്മദ് (37), മഞ്ചേരി സ്വദേശികളായ തോട്ടത്തില് അമീറുദ്ദീന് (45), മുള്ളന്പാറ ഔനിപുറത്ത് അബ്ദുള് റഷീദ് (39), ആലപ്പുഴ കൊമ്മാടി സ്വദേശി വിജയകുമാര് (47) എന്നിവരാണ് പിടിയിലായത്.
പഴയ 1000, 500 രൂപയുടെ നോട്ടുകളാണ് പിടികൂടിയത്. ഇവരില് നിന്ന് പുതിയ 2000 രൂപയുടെ രണ്ടു ലക്ഷത്തിലേറെ രൂപയും പിടിച്ചെടുത്തു. ചൊവ്വാഴ്ച രാത്രി 11 മണിയോടെയാണ് പാലക്കാട്-കോട്ടായി റോഡില് നിന്ന് പണം പിടികൂടിയത്. വാഹന പരിശോധനയ്ക്കിടെ നിര്ത്താതെ പോയ കാറുകള് സി.ഐ. ആര്. ശിവശങ്കരന്റെ നേതൃത്വത്തില് പിന്തുടര്ന്ന് പിടികൂടുകയായിരുന്നു. തമിഴ്നാട്, മലപ്പുറം രജിസ്ട്രേഷനുകളിലുള്ള രണ്ടു കാറുകളാണ് പിടിയിലായത്. വിദേശത്തുള്ളവര്ക്ക് ഇന്ത്യയില് നിരോധിച്ച നോട്ടുകള് ജൂണ് 30വരെ ബാങ്കില് മാറാന് അവസരമുണ്ട്.
ഇതിന്റെ മറവില് പണം ഗള്ഫിലെത്തിച്ച് എന്.ആര്.ഐ. അക്കൗണ്ടുകള് വഴി മാറ്റാനുള്ള ശ്രമമായിരുന്നുവെന്ന് പോലീസ് പറഞ്ഞു. വന് സംഘമാണ് ഇതിന് പിന്നിലുള്ളതെന്നാണ് സൂചന. ആറുകോടി രൂപയാണ് സംഘം പലയിടത്തു നിന്നായി സംഭരിച്ചതെന്നാണ് പോലീസിന്റെ നിഗമനം. പിടിയിലായ സംഘത്തോടൊപ്പം കൂടുതല് വാഹനങ്ങളുണ്ടായിരുന്നു. ഇവയിലാണ് ബാക്കി പണമെന്ന് കരുതുന്നു.
