മൊസൂള്: മൊസൂളില് പിടി അയയുന്ന ഇസ്ളാമിക് സ്റ്റേറ്റ് തീവ്രവാദികള് നഗരത്തില് നിന്നും ആള്ക്കാര് ഓടിരക്ഷപെടുന്നത് തടയാന് കുട്ടികളെ ലക്ഷ്യമിടുന്നതായി റിപ്പോര്ട്ട്. ഇറാഖി സേനയുടെ ആക്രമണം തടയാന് വ്യാപകമായി കുട്ടികളെയും നാട്ടുകാരെയും മനുഷ്യകവചമാക്കുകയും ചെയ്യുന്നുണ്ട്. കഴിഞ്ഞ ഒക്ടോബറില് ആക്രമണം ആരംഭിച്ചതിന് ശേഷം 850,000 പേര്ക്ക് വീടുവിട്ടോടേണ്ടി വന്നതായിട്ടാണ് ഇറാഖി സര്ക്കാര് മുന്നോട്ട് വെയ്ക്കുന്ന കണക്കുകള് പറയുന്നത്.
മൊസൂളില് നിന്നും ആള്ക്കാര് സമീപ പ്രദേശത്തേക്ക് രക്ഷപ്പെടുന്ന കുട്ടികള് ഉള്പ്പെടെയുള്ള കുടുംബങ്ങളെ തീവ്രവാദികള് കൊന്നൊടുക്കുകയാണെന്നും ആള്ക്കാര് ഓടി രക്ഷപ്പെടുന്നത് തടയാന് കുട്ടികളെ പിടിച്ചുവെയ്ക്കുകയാണെന്നും റിപ്പോര്ട്ടില് പറയുന്നു. ഈ ആഴ്ച ആദ്യം ഇറാഖി സേന ആരംഭിച്ചിരിക്കുന്ന ആക്രമണത്തിന്റെ ഭാഗമായി പതിയെ ഐഎസ് തീവ്രവാദികളുടെ പിടി അയഞ്ഞു കൊണ്ടിരിക്കുകയാണ്. പകുതിയും കുട്ടികള് ഉള്പ്പെടെ ഒരു ലക്ഷത്തില് പരം ജനസംഖ്യയുള്ള മൊസൂളില് ഇറാഖിസേനയുടെ നീക്കം സാവധാനമാണ്.
യുണിസെഫിന്റെ കണക്കുകള് പ്രകാരം 50 ലക്ഷം കുട്ടികള്ക്ക് അടിയന്തിര സഹായം ആവശ്യമാണ്. 2014 ല് ഇറാഖിന്റെ മൂന്നില് രണ്ടു ഭാഗവും ഇസ്ളാമിക് സ്റ്റേറ്റ് പിടിച്ചതിന് പിന്നാലെ 1,075 ഇറാഖി കുട്ടികളാണ് കൊല്ലപ്പെട്ടത്. 1,130 കുട്ടികള്ക്ക് പരിക്കേറ്റു. വെറും ആറുമാസത്തെ അക്രമത്തില് മാത്രം 152 കുട്ടികള് മരിക്കുകയും 255 പേര്ക്ക് പരിക്കേല്ക്കുകയും ചെയ്തു. പത്തുലക്ഷം കുട്ടികള്ക്കാണ് വിദ്യാഭ്യാസം നഷ്ടമായത്. കുട്ടികള് അക്രമത്തിന്റെ ഭാഗഭാക്കാകുകയും ചെയ്യുന്നുണ്ട്.
