ന്യൂഡല്ഹി: പുതിയ ഭരണഘടനാ ഭേദഗതി ബില്ലുകൾക്കും മണ്ഡല പുനർനിർണയ നീക്കത്തിനുമെതിരെ പാർലമെന്റിൽ ശക്തമായ നിലപാടെടുക്കാൻ 'ഇന്ത്യ' മുന്നണി തീരുമാനിച്ചു. വനിതാ സംവരണത്തിന്റെ പേരിൽ മണ്ഡലങ്ങൾ പുനർനിർണയിക്കാനും ജനാധിപത്യത്തെ അട്ടിമറിക്കാനുമുള്ള ബിജെപിയുടെ രഹസ്യ നീക്കമാണിതെന്ന് പ്രതിപക്ഷം ആരോപിക്കുന്നു.
മല്ലികാർജുൻ ഖർഗെയുടെ നേതൃത്വത്തിൽ നടന്ന പ്രതിപക്ഷ പാർട്ടികളുടെ യോഗത്തിലാണ് ബില്ലുകളെ എതിർക്കാൻ ധാരണയായത്. ഓരോ ബില്ലിന് പിന്നിലും രാജ്യത്തെ ഭിന്നിപ്പിക്കാനുള്ള ഗൂഢലക്ഷ്യങ്ങളുണ്ടെന്ന് കെ.സി. വേണുഗോപാൽ പറഞ്ഞു. വനിതാ സംവരണത്തെ നേരത്തെ തന്നെ പിന്തുണച്ചതാണെന്നും എന്നാൽ അതിന്റെ മറവിൽ മണ്ഡലങ്ങൾ പുനർക്രമീകരിക്കുന്നത് അംഗീകരിക്കില്ലെന്നും പ്രതിപക്ഷം വ്യക്തമാക്കി.
നിലവിലുള്ള 543 ലോക്സഭാ സീറ്റുകളിൽ തന്നെ ഉടൻ 33 ശതമാനം വനിതാ സംവരണം നടപ്പിലാക്കണമെന്നാണ് പ്രതിപക്ഷത്തിന്റെ ആവശ്യം. ലോക്സഭാ സീറ്റുകളുടെ എണ്ണം 850 ആയി ഉയർത്താനുള്ള നീക്കം രാഷ്ട്രീയ ലാഭത്തിന് വേണ്ടിയാണെന്നും മുന്നണി ആരോപിച്ചു.
പുതിയ സെൻസസ് പ്രകാരം മണ്ഡല പുനർനിർണയം നടത്തിയാൽ കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങൾക്ക് വലിയ തിരിച്ചടിയുണ്ടാകും. ജനസംഖ്യാ നിയന്ത്രണം വിജയകരമായി നടപ്പാക്കിയതിന് ലഭിക്കുന്ന ശിക്ഷയാണിതെന്നാണ് പ്രതിപക്ഷത്തിന്റെ വിമർശനം. കോൺഗ്രസ്, ടി.എം.സി, ഡി.എം.കെ തുടങ്ങിയ കക്ഷികൾ പങ്കെടുത്ത യോഗത്തിൽ, സഭയിൽ നേരിട്ടെത്തി ബില്ലിനെതിരെ വോട്ട് ചെയ്യാനും തീരുമാനിച്ചു.
മണ്ഡല പുനർനിർണയത്തിനെതിരെ മുഖ്യമന്ത്രി പിണറായി വിജയനും രൂക്ഷമായ പ്രതികരണം നടത്തി. സ്ത്രീ ശാക്തീകരണത്തെ മറയാക്കി കേന്ദ്രം അധികാരം ഉറപ്പിക്കാൻ ശ്രമിക്കുകയാണെന്നും, ജനസംഖ്യ കുറഞ്ഞ സംസ്ഥാനങ്ങളുടെ പ്രാതിനിധ്യം കുറയുന്നത് ഇരട്ടനീതിയാണെന്നും അദ്ദേഹം പറഞ്ഞു. ഇത് ഫെഡറൽ സംവിധാനത്തിന് ഭീഷണിയാണെന്നും മുഖ്യമന്ത്രി കൂട്ടിച്ചേർത്തു.
ബില്ലിന് മുൻപായി സമവായം ഉണ്ടാക്കാൻ കേന്ദ്രം ശ്രമിച്ചില്ലെന്ന് പ്രതിപക്ഷം കുറ്റപ്പെടുത്തി. ദക്ഷിണേന്ത്യൻ സംസ്ഥാനങ്ങൾക്ക് ആശങ്ക വേണ്ടെന്ന് മന്ത്രി കിരൺ റിജിജു പറഞ്ഞെങ്കിലും പ്രതിപക്ഷത്തിന്റെ കടുത്ത നിലപാട് ബില്ലിന്റെ ഭാവി നിർണ്ണായകമാക്കും. നാളെ പാർലമെന്റിൽ ബില്ലുകൾ അവതരിപ്പിക്കുമ്പോൾ വലിയ പ്രതിഷേധങ്ങൾക്കും തർക്കങ്ങൾക്കും രാജ്യം സാക്ഷ്യം വഹിച്ചേക്കും.
