പത്തനംതിട്ട: കടവരാന്തയില് ഉറങ്ങിയവരെ തെരുവുനായ്ക്കള് കൂട്ടമായെത്തി ആക്രമിച്ചു. ഒരാളുടെ ജനനേന്ദ്രിയം കടിച്ചുമുറിച്ചു. മറ്റൊരാളുടെ കൈയിലും കാലിലും കടിച്ചു. വ്യാഴാഴ്ച രാത്രി 11 നു കുമ്പഴ ജങ്ഷനിലാണു സംഭവം. മലയാലപ്പുഴ മലയാളം പ്ലാന്റേഷനിലെ തൊഴിലാളിയും തമിഴ്നാട് തിരുനെല്വേലി സ്വദേശിയുമായ വെങ്കിടേഷ് (61), കൂടല് നെടുമണ്കാവ് സ്വദേശി ഡേവിഡ് (50) എന്നിവരെയാണ് തെരുവുനായ്ക്കള് ദാരുണമായി ആക്രമിച്ചത്.
ഇരുവരും കടവരാന്തയില് സംസാരിച്ചിരുന്നശേഷം അവിടെത്തന്നെ കിടന്നുറങ്ങുകയായിരുന്നു. തെരുവു നായ്ക്കള് സ്ഥിരമായി ഈ കടത്തിണ്ണയുടെ പരിസരത്താണ് കിടന്നിരുന്നത്. തങ്ങളുടെ താവളം സ്വന്തമാക്കിയവരെ ഇവ കൂട്ടത്തോടെ എത്തി ആക്രമിക്കുകയായിരുന്നു. വെങ്കിടേഷും ഡേവിഡും നിലവിളിച്ചതോടെ പരിസരവാസികള് ഓടിയെത്തി.
ഫയര്ഫോഴ്സിനെ വിളിച്ചാണ് ചോരയില് കുളിച്ചുകിടന്ന ഇവരെ നഗരസഭ കൗണ്സിലര് അശോക് കുമാറിന്റെ നേതൃത്വത്തില് ആശുപത്രിയിലേക്കു കൊണ്ടുപോയത്. സ്ഥിതി ഗുരുതരമായതിനാല് ഇരുവരെയും കോട്ടയം മെഡിക്കല് കോളജിലേക്കു മാറ്റി. ജനനേന്ദ്രിയത്തിനു കടിയേറ്റ വെങ്കിടേഷിനെ ശസ്ത്രക്രിയയ്ക്കു വിധേയനാക്കാന് തീരുമാനിച്ചെങ്കിലും ബന്ധുക്കള് എത്താത്തതിനെത്തുടര്ന്ന് മാറ്റിവച്ചു.
