ജെയിംസ് ബോണ്ട് ചിത്രത്തില് അഭിനയിക്കാന് അവസരം കിട്ടിയാല് പോലും നൂറു ശതമാനവും നഗ്നമായി അഭിനയിക്കാന് പറ്റില്ലെന്നു നടി സഞ്ജന. ശക്തമായ ഇന്ത്യന് സംസ്ക്കാരത്തില് നിന്നുമാണ് വരുന്നതെന്നും അതിന്റെ പരിധികള് എപ്പോഴും സൂക്ഷിക്കാറുണ്ടെന്നും താരം വ്യക്തമാക്കി. പുതിയ സിനിമ ദണ്ഡുപാളയ 2 മായി ബന്ധപ്പെട്ട് പൂര്ണ്ണനഗ്നയായി ക്യാമറയ്ക്ക് മുന്നില് എത്തിയെന്ന വാര്ത്ത ഉണ്ടാക്കിയ വിവാദത്തിന് താരം ട്വിറ്ററിലൂടെയാണ് മറുപടി പറഞ്ഞത്.
സിനിമയില് താന് ഒരിക്കലും നഗ്നയായി അഭിനയിച്ചിട്ടില്ലെന്നും രഹസ്യഭാഗങ്ങള് ഒരു ടവ്വല് കൊണ്ടു മറച്ചുനില്ക്കുന്ന സ്വന്തം കാരാവാനില് വെച്ച് എടുത്ത ചിത്രങ്ങള് കൈവശമുണ്ടെന്നും താരം പറഞ്ഞു. സിനിമയില് പൂര്ണ്ണ നഗ്നയായി കാണുന്ന രംഗം മികച്ച രീതിയില് എഡിറ്റ് ചെയ്തതാണ്. കമ്പ്യൂട്ടര് വഴി കളര് ഗ്രേഡ് ചെയ്തും മറ്റുമാണ് ആ രീതിയില് ആക്കിയിരിക്കുന്നത്. ദിവസങ്ങള്ക്ക് മുമ്പാണ് സിനിമയില് പൂര്ണ്ണനഗ്നയായി നില്ക്കുന്ന രീതിയില് താരത്തിന്റെ ദൃശ്യങ്ങള് ഇന്റര്നെറ്റില് പ്രചരിച്ചത്. ഈ സീനുകള് സെന്സര്ബോര്ഡ് സിനിമയില് നിന്നും നീക്കിയിരുന്നു. ഇത് തന്നെ ഞെട്ടിച്ചെന്നും ഏറെ വിഷമിപ്പിച്ചെന്നും താരം പറഞ്ഞിരുന്നു. ഇപ്പോള് വൈറലായി മാറിയിരിക്കുന്ന സീന് താന് ഒരിക്കലും ചെയ്തിട്ടില്ലെന്നും പറഞ്ഞു.
ലൈംഗികപീഡനം നേരിടേണ്ടി വരുന്ന ഒരു ഇരയുടെ വേഷമാണ് താരത്തിന് ഈ സിനിമയില്. എന്നാല് സാമൂഹ്യമാധ്യമങ്ങളില് ജനങ്ങള് ആ രംഗത്തെ പ്രചരിപ്പിച്ച രീതി തന്നെ ദു:ഖിപ്പിക്കുകയും ഞെട്ടിക്കുകയും ചെയ്തതായി താരം പറഞ്ഞു. ജയില് അധികൃതരാല് ശാരീരികമായി പീഡിപ്പിക്കുന്ന കഥാപാത്രമാണെന്നും ചിലപ്പോള് നെഗറ്റീവായ ഒരു പ്രതികരണം പ്രേക്ഷകരില് നിന്നും ഉണ്ടായേക്കാമെന്നും നേരത്തേ തന്നെ അറിഞ്ഞിരുന്നു. എന്നിരുന്നാലും എഡിറ്റിംഗില് കാര്യങ്ങള് താരത്തിന്റെ പ്രതീക്ഷകളെ തകിടം മറിക്കുകയായിരുന്നു.
വ്യാപകമായി പ്രചരിച്ചുകൊണ്ടിരിക്കുന്ന വീഡിയോ നെറ്റില് നിന്നും എടുത്തുമാറ്റാന് ശ്രമങ്ങള് നടന്നു വരികയാണ്. വീഡിയോ എങ്ങിനെയാണ് ചോര്ന്നതെന്ന അന്വേഷണവും നടക്കുന്നുണ്ട്. എന്നാല് സംവിധായകന് ശ്രീനിവാസ രാജു ഇക്കാര്യത്തില് ഇതുവരെ പ്രതികരിച്ചിട്ടില്ല. അതേസമയം സിനിമ വിവാദത്തില് ആകുന്നത് ഇതാദ്യമല്ല. നേരത്തേ സിനിമയിലെ തന്നെ മറ്റൊരു നായികയായ പൂജാഗാന്ധിക്ക് കൂടുതല് പ്രാധാന്യം നല്കിയെന്ന് ആരോപിച്ച് സഞ്ജന ഗല്റാണി സിനിമയുടെ പ്രമോഷണല് പരിപാടികളില് നിന്നും വിട്ടു നിന്നിരുന്നു.
