സേലം: സ്വന്തം ജീവന് കാവേരി നദിക്ക് പകരം നല്കി തമിഴ്നാട്ടുകാരനായ യുവാവ് ജീവിതത്തിലേക്ക് വലിച്ചു കയറ്റിയത് എട്ടു സുഹൃത്തുക്കളെ. ജന്മദിനം ആഘോഷിക്കുന്നതിനിടയില് കാവേരി നദിയില് കൊട്ടവഞ്ചി മറിഞ്ഞ് പെട്ടുപോയ എട്ടു പേരെ ജീവിതത്തിലേക്ക് പിടിച്ചു കയറ്റി യുവാവ് മുങ്ങിമരിച്ചു. തിങ്കളാഴ്ച വൈകുന്നേരം മെട്ടൂരിന് സമീപം ഉണ്ടായ അപകടത്തില് സേലം ജില്ലയിലെ സുക്കംപെട്ടി സ്വദേശി 21 കാരന് പി മദനാണ് മുങ്ങിമരിച്ചത്.
നാമക്കല് ജില്ലയിലെ തിരുചെങ്കോടിന് സമീപം ഒരു സ്വകാര്യ കോളേജില് ബിരുദാനന്തര ബിരുദ വിദ്യാര്ത്ഥിയായ ഇയാള് ബന്ധുവായ തമിഴരശു എന്ന യുവാവ് ഉള്പ്പെടെയുള്ള എട്ടു പേരെയാണ് രക്ഷിച്ചത്. ബന്ധു കെ തമിഴരശുവിന്റെ പത്തൊമ്പതാം ജന്മദിനാഘോഷത്തിനായി എത്തിയതായിരുന്നു മദനും സുഹൃത്തുക്കളും. ഇവിടെ നിന്നും തിങ്കളാഴ്ച വൈകിട്ട് നാലു മണിയോടെ മദനും തമിഴരശനും ഉള്പ്പെടെ ഒമ്പതു പേര് മേച്ചേരി കൂനന്തിയൂരിലേക്ക് പോയി. ആഘോഷത്തിന്റെ ഭാഗമായി മദ്യപിച്ച ശേഷം എല്ലാവരും കുട്ടവഞ്ചിയില് കയറുകയായിരുന്നു. എന്നാല് ആള്ക്കാര് കൂടിയതിനെ തുടര്ന്ന് കുട്ടവഞ്ചി മുങ്ങി എല്ലാവരും വെള്ളത്തില് വീണു.
കൂട്ടത്തില് മദന് മാത്രമായിരുന്നു നീന്തല് അറിയാമായിരുന്നത്. അയാള് മറ്റുള്ള എല്ലാ സുഹൃത്തുക്കളേയും രക്ഷപെടുത്തിയെങ്കിലും ഒടുവില് മദന് ചെളിയില് പെട്ടു പോകുകയായിരുന്നു. ഇയാളുടെ മൃതദേഹം പിന്നീട് പോലീസ് കണ്ടെടുക്കുകയും മെട്ടൂര് സര്ക്കാര് ആശുപത്രിയിലേക്ക് പോസ്റ്റുമാര്ട്ടത്തിനായി അയയ്ക്കുകയും ചെയ്തു. കേസെടുത്ത പോലീസ് തുഴച്ചില്ക്കാരന് വേണ്ടി തെരച്ചില് നടത്തുകയാണ്.
