ചെന്നൈ: തെരഞ്ഞെടുപ്പ് ഫലം വന്ന് നാലു ദിവസം പിന്നിട്ടിട്ടും അനിശ്ചിതത്വം മാറാതെ തമിഴ്നാട് രാഷ്ട്രീയം. കോണ്ഗ്രസിനൊപ്പം സി.പി.ഐ, സി.പി.എം, വി.സി.കെ, മുസ്ലിം ലീഗ് പാര്ട്ടുകളുടെ പിന്തുണ ലഭിച്ചതോടെ ടി.വി.കെയ്ക്ക് ഭരണത്തിലെത്താന്വേണ്ട കേവല ഭൂരിപക്ഷമായെന്ന് റിപ്പോര്ട്ടുകളുണ്ടായിരുന്നു. ഇതോടെ വിജയ് തമിഴ്നാട് മുഖ്യമന്ത്രിയായി ഇന്ന് രാവിലെ 11 മണിക്ക് സത്യപ്രതിജ്ഞ ചെയ്യുമെന്ന റിപ്പോര്ട്ടുകളും പുറത്തുവന്നു.
എന്നാല്, വിജയ് 116 പേരുടെ പിന്തുണക്കത്ത് മാത്രമേ ഹാജരാക്കിയിട്ടുള്ളൂവെന്ന് ഗവര്ണര് ആര്.വി ആര്ലേക്കറുടെ ഓഫീസ് അറിയിച്ചു. കേവല ഭൂരിപക്ഷത്തിന് ആവശ്യമായ 118 പേരുടെ പിന്തുണ തെളിയിച്ചാല് മാത്രമേ സത്യപ്രതിജ്ഞയ്ക്കു ക്ഷണിക്കൂ എന്നാണ് ഗവര്ണറുടെ നിലപാട്. ഇതോടെ ഗവര്ണര് വിജയ്യെ സത്യപ്രതിജ്ഞയ്ക്കായി ക്ഷണിച്ചിട്ടില്ലെന്നും ശനിയാഴ്ച നടക്കേണ്ടിയിരുന്ന ചടങ്ങുകള് മാറ്റിവെച്ചതായും രാത്രി വൈകി റിപ്പോര്ട്ട് പുറത്തുവന്നു. ടി.വി.കെയുടെ 107 അംഗങ്ങള്ക്കു പുറമേ കോണ്ഗ്രസ് -അഞ്ച്, സി.പി.എം -രണ്ട്, സി.പി.ഐ -രണ്ട് അംഗങ്ങളുടെ പിന്തുണക്കത്താണ് ഹാജരാക്കിയിരിക്കുന്നത്. രണ്ടംഗങ്ങളുള്ള വി.സി.കെയും ഒരംഗമുള്ള മുസ്ലിം ലീഗും വിജയ്ക്കു പിന്തുണ പ്രഖ്യാപിച്ചിട്ടുണ്ടെങ്കിലും കത്ത് ഹാജരാക്കിയിട്ടില്ലാത്തതാണ് നിലവിലെ പ്രതിസന്ധിക്കു കാരണം. അതേസമയം, വി.സി.കെ രാഷ്ട്രീയ വിലപേശലിനുള്ള കരുനീക്കത്തിലാണെന്നും അഭ്യൂഹമുണ്ട്.
ഇന്നലെ വൈകിട്ട് കേവലഭൂരിപക്ഷത്തിനാവശ്യമായ 118 പേരുടെ പിന്തുണ അവകാശപ്പെട്ട് വിജയ്, ഗവര്ണര് രാജേന്ദ്ര വിശ്വനാഥ് അര്ലേക്കറെ കണ്ടിരുന്നു. സര്ക്കാര് രൂപീകരണവുമായി ബന്ധപ്പെട്ട് ഇരുവരും തമ്മില് നടക്കുന്ന മൂന്നാമത്തെ കൂടിക്കാഴ്ചയായിരുന്നു ഇത്. ദശകങ്ങളായി തമിഴ്നാട് രാഷ്ട്രീയം നിയന്ത്രിക്കുന്ന ഡി.എം.കെ, അണ്ണാഡി.എം.കെ. പാര്ട്ടികളെ ഞെട്ടിച്ചുകൊണ്ടാണ് വിജയ് നേതൃത്വം നല്കുന്ന തമിഴക വെട്രി കഴകം (ടി.വി.കെ) ആദ്യ തെരഞ്ഞെടുപ്പില് തന്നെ ഏറ്റവും വലിയ ഒറ്റക്കക്ഷിയായത്. എന്നാല്, ഒറ്റയ്ക്കു മത്സരിച്ച ടി.വി.കെയ്ക്ക് സര്ക്കാര് രൂപീകരിക്കാനാവശ്യമായ ഭൂരിപക്ഷം ലഭിച്ചില്ല. 234 അംഗ തമിഴ്നാട് നിയമസഭയില് സര്ക്കാര് രൂപീകരിക്കാന് 118 പേരുടെ പിന്തുണയാണു വേണ്ടത്. വിജയ് ജയിച്ച രണ്ടു മണ്ഡലങ്ങളടക്കം ടി.വി.കെയ്ക്ക് 108 അംഗങ്ങളാണുള്ളത്. ടി.വി.കെയെ പിന്തുണയ്ക്കാന് അഞ്ച് അംഗങ്ങളുള്ള കോണ്ഗ്രസ് നേരത്തെ തീരുമാനിച്ചിരുന്നു.
ഇതിനുപിന്നാലെയാണു രണ്ട് അംഗങ്ങള് വീതമുള്ള സി.പി.എം, സി.പി.ഐ, വി.സി.കെ എന്നീ കക്ഷികളും പിന്തുണ പ്രഖ്യാപിച്ചത്. ഇതോടെ 119 പേരുടെ പിന്തുണയായി. ഓരോ അംഗങ്ങളുള്ള മുസ്ലീം ലീഗും പിന്തുണ അറിയിച്ചതോടെ 120 പേരുടെ പിന്തുണയാണ് ടി.വി.കെ അവകാശപ്പെട്ടിരുന്നത്.
ഡി.എം.കെ. നേതൃത്വം നല്കുന്ന മുന്നണിയിലുള്ള കോണ്ഗ്രസ്, ടി.വി.കെയ്ക്കു പിന്തുണ പ്രഖ്യാപിച്ചതില് ഡി.എം.കെ. ആദ്യം കടുത്ത അതൃപ്തി പ്രകടിപ്പിച്ചിരുന്നു. എന്നാല്, പിന്നീട് സംസ്ഥാനത്ത് രാഷ്ട്രീയ അനിശ്ചിതത്വമുണ്ടാകാതിരിക്കാന് സഖ്യകക്ഷികള്ക്കു സ്വന്തം തീരുമാനമെടുക്കാമെന്നു ഡി.എം.കെ. നേതാവ് എം.കെ. സ്റ്റാലിന് നിലപാടെടുത്തു. ഇതോടെയാണു മുന്നണിലുള്ള ഇടതുപാര്ട്ടികളും വി.സി.കെയും ലീഗും ടി.വി.കെയെ പിന്തുണയ്ക്കാന് തീരുമാനിച്ചത്. ഈ പാര്ട്ടികളുടെയെല്ലാം പിന്തുണ വിജയ് അഭ്യര്ഥിച്ചിരുന്നു.
പുറത്തുനിന്നാകും പിന്തുണയെന്നും മന്ത്രിസഭയില് ചേരില്ലെന്നും ഇടതുപാര്ട്ടികള് വ്യക്തമാക്കി. കോണ്ഗ്രസും ലീഗും വി.സി.കെയും സര്ക്കാരില് ചേര്ന്നേക്കും. സി.പി.എം, സി.പി.ഐ ഓഫീസുകളിലെത്തിയ വിജയ് ഇടതുപാര്ട്ടികള്ക്കു നന്ദി പറഞ്ഞു. അതിനിടെ, ഡി.എം.കെയും അണ്ണാഡി.എം.കെയും തമ്മില് സഖ്യരൂപീകരണത്തിനു ചര്ച്ച നടക്കുന്നതായി വാര്ത്ത വന്നെങ്കിലും എം.കെ. സ്റ്റാലിന് ഇതു നിഷേധിച്ചു. നേരത്തെ രണ്ടു തവണ വിജയ് ഗവര്ണറെ കണ്ട് സര്ക്കാര് രൂപീകരണത്തിന് അവകാശമുന്നയിച്ചെങ്കിലും ഭൂരിപക്ഷമില്ലെന്നു ചൂണ്ടിക്കാട്ടി തള്ളുകയായിരുന്നു.
