റോഹ്ത്ക്: വിവാദ ആള്ദൈവം ഗുര്മീത് റാം റഹിം ജയിലില് വിഐപി പരിഗണന. ജയിലില് ഒരുക്കിയിരിക്കുന്ന പ്രത്യേക സെല്ലിലാണ് ഗുര്മീതിനെ താമസിപ്പിക്കുന്നത്. ഉപയോഗിക്കുവാന് ബോട്ടിലിലെ ശുദ്ധീകരിച്ച മിനറല് വാട്ടര് മാത്രമാണ് നല്കുന്നത്. ഇതിന് പുറമെ ഇയാള്ക്ക് സഹായത്തിന് ഒരു സഹായിയേയും ഏര്പ്പെടുത്തിയിട്ടുണ്ടെന്നാണ് ജയിലില് നിന്നും ലഭിക്കുന്ന സൂചനകള്.
2002ല് രണ്ട് സ്ത്രീകളെ ബലാത്സംഗം ചെയ്തുവെന്ന കേസില് ഗുര്മീത് റാം റഹിമിനെ കോടതി കുറ്റക്കാരനെന്ന് കണ്ടെത്തിയിരുന്നു. ഇയാള് ഇന്നലെ കോടതിയില് ഹാജരായതും വലിയ നാടകീയ പരിവേഷത്തോടെയാണ്. 250 കിലോമീറ്റര് ദൂരത്തില് ബുള്ളറ്റ് പ്രൂഫ് കാറില് 200 വാഹനങ്ങളുടെ അകമ്പടിയോടെയാണ് കോടതിയിലേക്ക് എത്തിയത്. നിരവധി അനുയായികളാണ് ഇത്തരത്തില് ഇയാളുടെ പിന്നാലെ എത്തിയത്.
തിങ്കളാഴ്ച സിബിഐ കോടതി ശിക്ഷ വിധിക്കും വരെ റാം റഹീമിനെ ജയിലിലാണ് താമസിപ്പിക്കുന്നത്. എന്നാല് കുറ്റക്കാരനാണെന്ന് കോടതി വിധിച്ചതോടെ അക്രമണം അഴിച്ചുവിട്ടതോടെ ഹെലികോപ്ടറിലായിരുന്നു ഇയാളെ റോഹ്ത്ക് ജയിലിലേക്ക് എത്തിച്ചത്.
ഹെലികോപ്ടറില് റോഹ്തകിലെത്തിച്ച ശേഷം ഒരു പോലീസ് ഗസ്റ്റ് ഹൗസ് താത്കാലിക ജയിലാക്കി മാറ്റിയാണ് റാം റഹീമിനെ താമസിപ്പിച്ചത്. പിന്നീടേ വൈകിട്ടാണ് ഇയാളെ ജയിലിലേക്ക് മാറ്റിയത്. സ്ഥിതിഗതികള് കണക്കിലെടുത്ത് വീഡിയോ കോണ്ഫറന്സിലൂടെയാണ് തിങ്കളാഴ്ച കോടതി നടപടികള് ഉണ്ടാവുക.
