രാമലീലയുടെ റിലീസ് തടയാനും സിനിമയെ പരാജയപ്പെടുത്താനും മലബാര് മേഖലയില് വന് നീക്കങ്ങള് നടത്തുന്നെന്ന ആരോപണങ്ങള്ക്ക് മറുപടിയുമായി ലിബര്ട്ടി ബഷീര് രംഗത്ത്. മലബാര് മേഖലയിലെ തീയറ്ററുടമകളെ സമീപിച്ച് ബഷീര് രാമലീലയ്ക്ക് ഡേറ്റ് നല്കിരുതെന്നും, സമ്മതിക്കാത്തവരോട് തീയറ്റര് തകര്ക്കുമെന്ന് ഭീഷണിപ്പെടുത്തിയതായുമാണ് ആരോപണം വന്നത്. എന്നാല് ഇതെല്ലാം കള്ളമാണെന്ന് ബഷീര് പറഞ്ഞു.
തന്റെ ഉടമസ്ഥതയിലുള്ള തീയറ്ററില് രാമലീല പ്രദര്ശിപ്പിക്കുന്നുണ്ട്. ഇക്കാര്യം നേരത്തേ തന്നെ ദിലീപിനോടും അരുണ് ഗോപിയോടും പറഞ്ഞിട്ടുണ്ട്. ചിത്രം ആദ്യ ദിവസം തന്നെ താന് കാണും. സിനിമ എന്നത് ഒരു വ്യക്തിയുടേതല്ല കൂട്ടായ്മയുടെ വിജയമാണെന്ന് ഒരു മാധ്യമത്തോട് ലിബര്ട്ടി പറഞ്ഞു.
ദിലീപിനോടുള്ള ദേഷ്യമോ പകയോ കാരണം സിനിമ ഉപേക്ഷിച്ചാല്, അത് സിനിമയ്ക്കു മാത്രമേ ദോഷം ചെയ്യൂ. മലയാള സിനിമയില് ഒരാള് പോലും ഈ സിനിമയ്ക്ക് എതിര് നില്ക്കരുതെന്ന അഭിപ്രായമാണുള്ളത്. ഒറ്റപ്പെട്ട ഒരാള് മാത്രമാണ് എവിടെയോ ശബ്ദം ഉയര്ത്തിയത്.
പത്തു പതിനഞ്ച് വര്ഷം കഷ്ടപ്പെട്ട് സിനിമയില് നിന്ന് അരുണ് ആദ്യമായി സംവിധാനം ചെയ്യുന്ന ചിത്രം കൂടിയാണ് രാമലീല. അരുണിന്റെ മാത്രമല്ല ഒരുകൂട്ടം ആളുകളുടെ കഷ്ടപ്പാടും സ്വപ്നവുമൊക്കെ ഈ സിനിമയിലുണ്ട്. കുറേക്കാലമായി സിനിമയില് നിന്ന് ചോറുണ്ണുന്നു. അതിനെ തള്ളിക്കളയരുത്. സിനിമയ്ക്ക് പ്രോത്സാഹനം കൊടുക്കുകയാണ് ചെയ്യേണ്ടത്. ഇവിടെയുള്ള തീയറ്റര് ഉടമകളോടും ചിത്രം പ്രദര്ശിപ്പിക്കണമെന്ന് ആവശ്യപ്പെട്ടിട്ടുണ്ട്. പിന്നെ പടത്തിന് ഒരു വിധിയുണ്ട്. ദിലീപ് ജയിലില് കിടന്നാലും പുറത്തിറങ്ങിയാലും സിനിമ നല്ലതാണെങ്കില് വിജയിക്കും മോശമാണെങ്കില് പരാജയപ്പെടുമെന്നും ലിബര്ട്ടി പറഞ്ഞു.
