പുതിയ മാരുതി എസ്-ക്രോസ് ഇന്ത്യയില് പുറത്തിറങ്ങി. 8.49 ലക്ഷം രൂപയാണ് അപ്ഡേറ്റഡ് ക്രോസ്ഓവര്, എസ്-ക്രോസിന്റെ ഡല്ഹി എക്സ്ഷോറൂം വില. സിഗ്മ, ഡെല്റ്റ, സെറ്റ, ആല്ഫ എന്നിങ്ങനെ നാല് വേരിയന്റുകളിലായാണ് പുതിയ എസ്-ക്രോസ് ഒരുങ്ങുന്നത്. 2017 മാരുതി എസ്-ക്രോസിന്റെ പ്രധാന വിശേഷം പുതുക്കിയ ബോഡി സ്റ്റൈലിംഗും, ഒരുപിടി പുത്തന് ഫീച്ചറുകളുമാണ്.
മാരുതിയുടെ പ്രീമിയം ഡീലര്ഷിപ്പ് നെക്സ മുഖനയാണ് എസ്-ക്രോസ് ലഭ്യമാവുക. 95 ശതമാനം ആഭ്യന്തര ഘടകങ്ങളാല് നിര്മ്മിതമാണ് പുതിയ മാരുതി എസ്-ക്രോസ്. പുതിയ ക്രോം ഗ്രില്ലും, റീഡിസൈന് ചെയ്ത ഹെഡ്ലാമ്പുകളും, എല്ഇഡി ഡെയ്ടൈം റണ്ണിംഗ് ലൈറ്റുകള്ക്ക് ഒപ്പമുള്ള പ്രൊജക്ടര് ഹെഡ്ലാമ്പുകളും, മസ്കുലാര് ഫ്രണ്ട് ബമ്പറും, വീതിയേറിയ എയര് ഡാമും ഒത്ത് ചേര്ന്നതാണ് പുതിയ ക്രോസ്ഓവറിന്റെ മുഖരൂപം. സ്പോര്ടിയര് അലോയ് വീലുകളും, ഇന്റഗ്രേറ്റഡ് ഇന്ഡിക്കേറ്റര് ലൈറ്റുകള്ക്ക് ഒപ്പമുള്ള ORVM കളും പുതിയ മോഡലില് ഇടംപിടിച്ചിട്ടുണ്ട്. എക്സ്റ്റീരിയറിന് ഒപ്പം ഇന്റീരിയറിലും മാറ്റങ്ങള് ദൃശ്യമാണ്.
പുതുക്കിയ ഡാഷ്ബോര്ഡും, പുതിയ അപ്ഹോള്സ്റ്ററിയും, പുത്തന് ടച്ച്സ്ക്രീന് ഇന്ഫോടെയ്ന്മെന്റ് സിസ്റ്റവുമെല്ലാം അകത്തളത്തെ വിശേഷങ്ങളാണ്. പുതിയ എസ്-ക്രോസ് സുരക്ഷയുടെ കാര്യത്തിലും പിന്നിലല്ല. ഡ്യൂവല് എയര്ബാഗുകള്, ഇബിഡിക്ക് ഒപ്പമുള്ള എബിഎസ്, ISOFIX ചൈല്ഡ് സീറ്റ് മൗണ്ടുകള് എന്നിവ വേരിയന്റുകളില് ഉടനീളം സ്റ്റാന്ഡേര്ഡ് ഫീച്ചറായി ഇടംപിടിക്കും. പുഷ് സ്റ്റാര്ട്ട്/സ്റ്റോപ് ബട്ടണ്, കീലെസ് എന്ട്രി, റിയര് പാര്ക്കിംഗ് സെന്സര്, റിയര് ക്യാമറ എന്നിവയും പുതിയ എസ്-ക്രോസിന്റെ ഫീച്ചറുകളാണ്. 1.3 ലിറ്റര് ഡീസല് എഞ്ചിന് മാത്രമാണ് 2017 എസ്-ക്രോസില് മാരുതി ലഭ്യമാക്കുന്നത്. സുസൂക്കിയുടെ സ്മാര്ട്ട് ഹൈബ്രിഡ് സാങ്കേതികതയില് ഒരുങ്ങിയതാണ് 1.3 ലിറ്റര് DDiS എഞ്ചിന്. ടോര്ഖ് അസിസ്റ്റ്, ഐഡില്-സ്റ്റോപ്-സ്റ്റാര്ട്ട്, ബ്രേക്ക് എനര്ജി റീജനറേഷന് സിസ്റ്റം, ഗിയര് ഷിഫ്റ്റ് ഇന്ഡിക്കേറ്റര് എന്നിവ ഉള്പ്പെടുന്നതാണ് സ്മാര്ട്ട് ഹൈബ്രിഡ് സാങ്കേതികത.
