ന്യൂഡല്ഹി: ടിപ്പു സുല്ത്താന് ജയന്തിക്ക് തന്നെ ക്ഷണിക്കരുതെന്ന് കേന്ദ്രമന്ത്രി അനന്ത്കുമാര് ഹെഗ്ഡെ. കര്ണാടക സര്ക്കാരിനെ ഇക്കാര്യം ഔദ്യോഗികമായി മന്ത്രി അറിയിച്ചു. കര്ണാടക ചീഫ് സെക്രട്ടറിക്ക് അയച്ച കത്തിലാണ് മന്ത്രി ഇക്കാര്യം ആവശ്യപ്പെട്ടത്. നവംബര് 10ന് ടിപ്പു ജയന്തി ആഘോഷിക്കാനിരിക്കെയാണ് മന്ത്രിയുടെ പിന്മാറ്റം. പരിപാടിയില് അതിഥികളുടെ കൂട്ടത്തില് തന്റെ പേര് ഉള്പ്പെടുത്തരുതെന്ന് കര്ണാടക ചീഫ് സെക്രട്ടറിക്കും ഉത്തര കന്നഡ ഡെപ്യൂട്ടി കമ്മീഷണര്ക്കും അയച്ച കത്തില് ഹെഗ്ഡെ ആവശ്യപ്പെട്ടു.
ടിപ്പു സുല്ത്താന് വര്ണവെറിയനും മതഭ്രാന്തനും കൊലയാളിയുമാണെന്ന് ഹെഗ്ഡെ പറഞ്ഞു. അങ്ങനെയുള്ള ടിപ്പുവിന്റെ ജന്മവാര്ഷികത്തിന് ക്ഷണിക്കപ്പെടുന്നത് അപമാനമായി കരുതുന്നു. അതിനാല് തന്നെ ഒഴിവാക്കണമെന്ന് ആവശ്യപ്പെട്ടതായി ഹെഗ്ഡെ വ്യക്തമാക്കി. ഉത്തര കന്നഡയില് നിന്നുള്ള പാര്ലമെന്റ് അംഗമാണ് ഹെഗ്ഡെ. പ്രോട്ടോക്കോള് പ്രകാരം ജില്ലയിലെ എല്ലാ പരിപാടികളിലും കേന്ദ്രമന്ത്രിയെ ഉള്പ്പെടുത്തേണ്ടതാണ്. എന്നാല് ഇത് തടയുന്നതിന് വേണ്ടിയാണ് കേന്ദ്രമന്ത്രി കത്തെഴുതിയത്.
അതേസമയം അനന്ത്കുമാര് ഹെഗ്ഡെ അടക്കം എല്ലാ കേന്ദ്ര-സംസ്ഥാന നേതാക്കളെയും ടിപ്പു ജയന്തിക്ക് ക്ഷണിക്കുമെന്ന് കര്ണാടക മുഖ്യമന്ത്രി സിദ്ധരാമയ്യ പറഞ്ഞു. ടിപ്പു ജയന്തിക്ക് രാഷ്ട്രീയ നിറം നല്കാനാണ് ഹെഗ്ഡെ ശ്രമിക്കുന്നതെന്നും സിദ്ധരാമയ്യ പറഞ്ഞു.
2015 മുതല് കര്ണാടക സര്ക്കാര് ടിപ്പു ജയന്തി ആഘോഷിച്ചുവരികയാണ്. ആര്.എസ്.എസും ബി.ജെ.പിയും ഇതിനെതിരെ ശക്തമായ എതിര്പ്പ് ഉന്നയിച്ചിരുന്നു. ടിപ്പു ജയന്തി ആഘോഷിക്കാനുള്ള കര്ണാടക സര്ക്കാര് തീരുമാനം ന്യൂനപക്ഷ പ്രീണനമാണെന്നാണ് ബി.ജെ.പി ആര്.എസ്.എസ് നേതാക്കളുടെ ആരോപണം.
