രാംസമന്ദ് (രാജസ്ഥാന്): 'ലൗ ജിഹാദ്' ആരോപിച്ച് രാജസ്ഥാനില് മുസ്ലീം ആയ തൊഴിലാളിലെ ജീവനോടെ ചുട്ടെരിച്ചു. യുവാവിനെ ക്രൂരമായി മര്ദ്ദിച്ച് തീകൊടുത്തുന്ന ദൃശ്യങ്ങള് മൊബൈലില് ചിത്രീകരിച്ച വീഡിയോ പ്രചരിപ്പിച്ച ദാരുണ സംഭവത്തില് നീതി തേടി ഒരു കുടുംബം. മൃഗത്തെ കൊല്ലുന്നതിനേക്കാളും ഭീകരമായി പച്ചയ്ക്കു കത്തിക്കുകയും, അത് ലോകത്തിനു മുന്നില് പ്രചരിപ്പിക്കുകയും ചെയ്തവരെ തൂക്കിലേറ്റണമെന്നും ദാരുണമായി കൊല്ലപ്പെട്ട മുഹമ്മദ് അഫ്രസുളിന്റെ കുടുംബം ആവശ്യം ഉയര്ത്തി. മനുഷ്യമനസാക്ഷിയെ ഞെട്ടിച്ച ഈ കൊലപാതകത്തിനു പിന്നില് ഗൂഡാലോചന ഉണ്ടെന്നും കുടുംബം ആരോപിച്ചു.
സംഭവത്തില് രാജസ്ഥാന് ആഭ്യന്തരമന്ത്രി ഗുലാബ് ചന്ദ് കട്ടാരിയ പ്രത്യേകസംഘത്തെ അന്വേഷണത്തിന് നിയോഗിച്ചിരുന്നു. സംഭവം വര്ഗീയ സംഘര്ഷത്തിലേക്ക് നീങ്ങാന് സാധ്യതയുണ്ടെന്ന റിപ്പോര്ട്ടിനെ തുടര്ന്ന് സര്ക്കാര് അതീവ ജാഗ്രതയിലാണ്. കേസിലെ പ്രധാന പ്രതി ശംഭുലാല് റീഗര് അറസ്റ്റിലായെന്ന് ആഭ്യന്തരമന്ത്രി അറിയിച്ചു.
പശ്ചിമ ബംഗാളിലെ മാല്ദയില് നിന്ന് കുടിയേറിയ തൊഴിലാളിയാണ് മുഹമ്മദ് അഫ്രസുള്. രാംസമന്ദില് കരാര് തൊഴിലാളിയായിരുന്നു ഇയാള്. യുവാവിനെ മര്ദ്ദിക്കുന്നതായി വീഡിയോയില് കാണുന്നയാളാണ് അറസ്റ്റിലായ ശുംഭുലാല് റീഗര്. ഇയാളുടെ 14 വയസുള്ള അനന്തരവനാണ് ദാരുണ ദൃശ്യം മൊബൈലില് പകര്ത്തിയത്.
ഇത് അതിക്രൂര കൊലപാതകമാണെന്നും, പ്രഥമദൃഷ്ട്യാ മാനസികമായി ഫിറ്റ് ആയ ഒരാളാണ് ഇതു ചെയ്തതെന്ന് കാണാന് കഴിയില്ലെന്നും രാജസ്ഥാന് ഡിജിപി ഒ.പി ഗല്ഗോത്ര മാധ്യമങ്ങളോട് വ്യക്തമാക്കി. സംഭവത്തിനു പിന്നാലെ കൊല്ക്കത്തയിലുള്ള ബന്ധുക്കളെ രാജസ്ഥാന് പോലീസ് വിവരമറിയിച്ചു. തുടര്ന്ന് ബന്ധുക്കള് സംഭവസ്ഥലത്ത് എത്തിയിട്ടുണ്ട്. ദിവസവും വീട്ടിലേയ്ക്ക് മുഹമ്മദ് വിളിക്കാറുണ്ടായിരുന്നുവെന്നും, അവസാനമായി ചൊവാഴ്ചയും വിളിച്ചുവെന്നും ബന്ധുക്കള് പറയുന്നു. പേരക്കുട്ടികള് വരെയുള്ള ആള്ക്ക് എന്ത് ലൗ ജിഹാദ് ആണെന്ന് മനസിലാവുന്നില്ല. അച്ഛനെ കൊല്ലുന്ന വീഡിയോ കണ്ടുവെന്നും, അതുപോലെ തന്നെ കുറ്റക്കാരെയും കൊല്ലണമെന്നും മകള് പറയുന്നൂ. മൂന്നു പെണ്മക്കളുടെ അച്ഛനാണ് മുഹമ്മദ്. ഇളയ മകളുടെ കല്യാണത്തിനായി ഈ മാസം വീട്ടിലെത്താനിരുന്നതിടെയാണ് ദാരുണ ദുരന്തം കുടുംബത്തെ തേടി എത്തിയത്.
ജോലി വാഗ്ദാനം ചെയ്താണ് റീഗര് തൊഴിലാളിയെ ഇവിടെ എത്തിച്ചത്. തന്റെ ക്രൂരകൃത്യം റെക്കോര്ഡ് ചെയ്യാന് ഒരു സുഹൃത്തിനെയും റീഗര് ഒപ്പംകൂട്ടി. ജീവനുവേണ്ടി മുഹമ്മദ് തന്റെ കൊലയാളിയോട് കേഴുന്നതും കോടാലികൊണ്ട് അടിച്ചുവീഴ്ത്തുമ്പോള് സഹായത്തിന് നിലവിളിക്കുന്നതും വീഡിയോവില് കാണാം. ജീവനോടെ കത്തിക്കുമ്പോഴും അയാള് നിലവിളിക്കുകയായിരുന്നു. തന്റെ ഭര്ത്താവിനെ കൊന്നവരെ നിയമത്തിനു മുന്നില് കൊണ്ടുവരണം. അവരെ തുക്കിലേറ്റുന്നതു ലോകം കാണണമെന്നും ഭാര്യ പറയുന്നു. ഒരു മുസ്ലീം ആയതുകൊണ്ട് മാത്രമാണ് തന്റെ ഭര്ത്താവ് കൊല്ലപ്പെട്ടതെന്ന് ഭാര്യ പറയുന്നു.
വീഡിയോയില് ഒരു പെണ്കുട്ടിയെയും കാണാം. കൊലയാളിയുടെ സഹോദരിയുമായി മുഹമ്മദിനുള്ള അതിരുവിട്ട ബന്ധമാണ് ലൗ ജിഹാദ് ആരോപിച്ച് കൊലപാതകത്തിലേക്ക് നയിച്ചതെന്നും റിപ്പോര്ട്ടുണ്ട്. സ്ഥലത്തുനിന്നും പാതി കത്തിയ നിലയില് മൃതദേഹവും കൊലപാതകത്തിന് ഉപയോഗിച്ച കോടാലിയും ഒരു സ്കൂട്ടറും കണ്ടെടുത്തു.
മുഹമ്മദ് അഫ്രസുള് കുടുംബസമേതമാണ് രാംസമന്ദില് താമസിക്കുന്നത്. കൊലപാതകത്തിലേക്ക് നയിച്ച കാരണം വ്യക്തമല്ലെന്ന് പോലീസ് പറയുന്നു. പ്രധാനപ്രതിക്കായി തെരച്ചില് നടത്തുകയാണെന്നും ഇയാളെ കിട്ടിയാലെ കാരണം വ്യക്തമാകൂവെന്നുമാണ് പോലീസ് പറയുന്നത്. ഇരുവരും തമ്മിലുള്ള വ്യക്തിവൈരാഗ്യമാണ് 'ലൗ ജിഹാദ്' എന്ന് പേരിട്ട അരുംകൊലയിലേക്ക് നയിച്ചതെന്ന് പോലീസ് കരുതുന്നു.
