കോട്ടയം: കേരളത്തിലെ ഭൂരിപക്ഷം സ്ത്രീകളും ഗാര്ഹിക പീഡനത്തെ പിന്തുണയ്ക്കുന്നുവെന്ന വാര്ത്തയെ വിമര്ശിച്ച് ജനാധിപത്യ മഹിളാ അസോസിയേഷന് നേതാവ് സുജ സൂസന് ജോര്ജ്. ആ വാര്ത്തയില് കാര്യമായ തകരാറുണ്ടെന്ന് സുജ ഫെയ്സ്ബുക്ക് പോസ്റ്റില് കുറിച്ചു. കേരളത്തിലെ 69 ശതമാനം സ്ത്രീകള് ഗാര്ഹിക പീഡനത്തെ പിന്തുണയ്ക്കുന്നു എന്നായിരുന്നു പ്രമുഖ പത്രം പുറത്തുവിട്ട വാര്ത്ത. സര്വേയുടെ അടിസ്ഥാനത്തിലായിരുന്നു വാര്ത്ത.
കേരളത്തിലെ 69 ശതമാനം സ്ത്രീകളും ഗാര്ഹിക പീഡനത്തെ അനുകൂലിക്കുന്നു എന്നത് അവിശ്വസനീയമാണെന്ന് സുജ പറഞ്ഞു. പുരുഷാധിപത്യം സാംശീകരിച്ച സമൂഹമെന്നോ പീഡിതമെങ്കിലും ബോധപൂര്വം കുടുംബത്തിന് വേണ്ടി സഹിക്കുന്ന സ്ത്രീകളുണ്ടെന്നോ പറഞ്ഞാല് സത്യമാണ്. ഇവരെല്ലാം തരം കിട്ടുമ്പോഴെല്ലാം പുരുഷ പീഡനത്തിനെതിരെ വര്ത്തമാനമെങ്കിലും പറയുന്നവരാണ്.
അപ്പോള് ഈ സര്വേയില് എന്തോ ദുരുദ്ദേശവും വലിയ തലക്കെട്ടോടെയുള്ള പത്ര വാര്ത്തയില് അമിതമായ ആവേശപ്രകടനവും കണ്ടു പോയാല് കുറ്റം പറയാനാകില്ല. അതിനാല് സര്വേ സര്വേ എന്ന് പറയാതെ വിശദാംശങ്ങള് കൂടി പുറത്തു വിടണമെന്നും സുജ സൂസന് ജോര്ജ് കൂട്ടിച്ചേര്ത്തു.
സുജ സൂസന് ജോര്ജിന്റെ ഫെയ്സ്ബുക്ക് പോസ്റ്റ്
എന്തോ തകരാറുണ്ട്..സര്വ്വേഫലത്തിനല്ല.സര്വ്വേയുടെ രീതിശാസ്ത്രത്തിന്. കേരളത്തിലെ 69% സ്ത്രീകള് ഗാര്ഹികപീഡനത്തിനെ അനുകൂലിക്കുന്നു എന്നു പറഞ്ഞാല് ഞാന് വിശ്വസിക്കില്ല. പുരുഷാധിപത്യം സ്വാംശീകരിച്ച സമൂഹമെന്നോ പീഡിതമെങ്കിലും ബോധപൂര്വ്വം കുടുംബത്തിനു വേണ്ടി സഹിക്കുന്ന സ്ത്രീകളുണ്ടെന്നോ പറഞ്ഞാലത് സത്യമാണ്. പക്ഷേ ഇവരൊക്കെയും തരം കിട്ടുമ്പോഴൊക്കെ പുരുഷപീഡനത്തിനെതിരെ വര്ത്തമാനമെങ്കിലും പറയുന്നവരാണ്.
അപ്പോള് ഈ സര്വ്വേയില് എന്തോ ദുരുദ്ദേശവും വലിയ തലക്കെട്ടോടെയുള്ള പത്രവാര്ത്തയില് അമിതമായ ആവേശപ്രകടനവും കണ്ടുപോയാല് കുറ്റം പറയാനാവില്ല.അതിനാല് സര്വ്വേ,സര്വ്വേ എന്നു പറയാതെ വിശദാംശങ്ങള് കൂടി പുറത്തു വിടണം.
ഇനി ആ സര്വ്വേഫലം ശരിയാണെന്നു വന്നാല് കേരളം അടിയന്തരമായി പാഠ്യപദ്ധതി പരിഷ്ക്കരണം ഉള്പ്പെടെയുള്ള വലിയ ബോധവല്ക്കരണ പരിപാടികളിലേക്ക് പോകേണ്ടതുണ്ട്.
