കണ്ണൂര്: യൂത്ത് കോണ്ഗ്രസ് പ്രവര്ത്തകന് ഷുെഹെബിന്റെ കൊലപാതകവുമായി ബന്ധപ്പെട്ടും അക്രമ പരമ്പരകളുടെ പശ്ചാത്തലത്തിലും കണ്ണൂരില് ഇന്ന് സര്ക്കാര് സമാധാന യോഗം വിളിക്കും. കലക്ടറേറ്റില് രാവിലെ 10.30 നു ചേരുന്ന യോഗത്തില് മന്ത്രി എ.കെ. ബാലന് അധ്യക്ഷത വഹിക്കും. എല്ലാ രാഷ്ട്രീയ കക്ഷികളുടെയും പ്രതിനിധികളെ യോഗത്തിലേക്കു ക്ഷണിച്ചിട്ടുണ്ട്.
യോഗത്തില് പങ്കെടുക്കുമെന്ന് പ്രതിപക്ഷ നേതാവ് രമേശ് ചെന്നിത്തല അറിയിച്ചു. അതേ സമയം യു.ഡി.എഫ്. സമാധാന യോഗത്തെ ചോദ്യം ചെയ്തെങ്കിലും മുഖ്യമന്ത്രി പിണറായി വിജയനായിരുന്നു യോഗം വിളിക്കേണ്ടതെന്നു മുന് മുഖ്യമന്ത്രി ഉമ്മന്ചാണ്ടി പറഞ്ഞു. സമാധാന യോഗം കബളിപ്പിക്കലാണെന്ന് മുസ്ലിം ലീഗ് കുറ്റപ്പെടുത്തി. കൊല്ലിച്ചവരും കൊന്നവരും നടത്തുന്ന ചായ സത്കാരം ബഹിഷ്കരിക്കണമെന്നു യൂത്ത് ലീഗ് ആവശ്യപ്പെട്ടു. മുഖ്യമന്ത്രിയുടെ നിര്ദേശ പ്രകാരമാണ് എ.കെ. ബാലന് യോഗത്തില് അധ്യക്ഷത വഹിക്കുന്നത്.
അതിനിടയില് കൊല്ലപ്പെട്ട ഷുഹൈബിന്റെ കുടുംബത്തെ സഹായിക്കാന് കണ്ണൂരില് കോണ്ഗ്രസ് ഇന്ന് ഫണ്ട് പിരിവ് നടത്തുന്നുണ്ട്. ഫണ്ടു പിരിവിനായി ഇറങ്ങിയ കോണ്ഗ്രസ് പ്രവര്ത്തകരെ സിപിഎം പ്രവര്ത്തകര് മര്ദ്ദിച്ചതായി ആരോപണമുണ്ട്. അതേസമയം കണ്ണൂരില് മുമ്പും നിരവധി സമാധാനയോം നടന്നിട്ടുണ്ടെന്നും അക്രമങ്ങളും കൊലപാതകങ്ങളും ആവര്ത്തിക്കുന്ന സ്വഭാവവും ഉണ്ടെന്നും വിമര്ശനമുണ്ട്.അതിനിടയില് സിപിഎം അക്രമങ്ങളില് പ്രതിഷേധിച്ച് കെകെ രമയുടെ നേതൃത്വത്തില് ഡല്ഹി എകെജി ഭവന് മുന്നില് ആര്എംപി നേതാക്കള് ഇന്ന് ധര്ണ്ണ നടത്തുന്നുണ്ട്.
