ബംഗളുരു: കേരളാ ബ്ലാസ്റ്റേഴ്സിന്റെ ഇന്ത്യന് സൂപ്പര് ലീഗ് ഫുട്ബോള് സീസണ് നാലിലെ പതനം പൂര്ണമായി. ഇന്നലെ ശ്രീകണ്ഠീരവ സ്റ്റേഡിയത്തില് നടന്ന മത്സരത്തില് ബംഗളുരു എഫ്.സിയോട് ഏകപക്ഷീയമായ രണ്ടു ഗോളുകള്ക്കു തോറ്റതോടെയാണു ബ്ലാസ്റ്റേഴ്സിന്റെ പതനം പൂര്ണമായത്.
മികുവും ഉദാന്ത സിങും ഇഞ്ചുറി ടൈമില് നേടിയ ഗോളുകളാണ് നിലവിലെ റണ്ണര് അപ്പുകളായ ബ്ലാസ്റ്റേഴ്സിനു വിലങ്ങായത്. കളിയുടെ അവസാന മിനിട്ടു വരെ പൊരുതിയെന്ന ആശ്വാസവുമായാണ് കോച്ച് ഡേവിഡ് ജെയിംസും സംഘവും കളിക്കളം വിട്ടത്. ജയത്തോടെ ബംഗളുരു ഒന്നാംസ്ഥാനത്തെത്തി. 18 കളികളില്നിന്ന് 40 പോയിന്റാണ് ബംഗളുരുവിന്റെ നേട്ടം. അത്രയും കളികളില്നിന്ന് 25 പോയിന്റ് നേടിയ ബ്ലാസ്റ്റേഴ്സ് ആറാംസ്ഥാനത്താണ്.
രണ്ടാംസ്ഥാനത്തുള്ള എഫ്.സി. പുനെ സിറ്റി (29 പോയിന്റ്), ചെന്നൈയിന് എഫ്.സി. (29 പോയിന്റ്) എന്നിവരാണു ബംഗളുരുവിനെ കൂടാതെ പ്ലേഓഫില് കടന്നത്. ഇരുവര്ക്കും ഒരു മത്സരം കൂടിയുണ്ട്. നാലാം സ്ഥാനത്തുള്ള എഫ്.സി. ഗോവ 17 കളികളില്നിന്ന് 26 പോയിന്റുമായി പ്ലേഓഫിന് അരുകിലാണ്. ജംഷഡ്പുര് എഫ്.സിക്കെതിരേ നടക്കുന്ന മത്സരത്തില് ജയിച്ചാല് ഗോവ മുന്നേറും.
അതേസമയം, തോല്വിയോടെ സൂപ്പര് കപ്പിലേക്ക് നേരിട്ട് യോഗ്യത നേടാനുള്ള ബ്ലാസ്റ്റേഴ്സിന്റെ സാധ്യതയും മങ്ങി. ഐഎസ്എല്ലില് നിന്നു ആറു ടീമുകള്ക്ക് മാത്രമാണ് സൂപ്പര് കപ്പിലേക്ക് പ്രവേശനം. 25 പോയിന്റോടെ ബ്ലാസ്റ്റേഴ്സ് മത്സരങ്ങള് പൂര്ത്തിയാക്കിയപ്പോള് ഒരു മത്സരം അവശേഷിക്കുന്ന മുംബൈ തോറ്റാല് മാത്രമേ ബ്ലാസ്റ്റേഴ്സിനു സൂപ്പര് കപ്പിലേക്കു സാധ്യത നേടാനാകൂ.
