ആദ്യ ക്രോസോവർ ഹാച്ച്ബാക്ക് ഫ്രീസ്റ്റൈലുമായി ഫോർഡ് ഇന്ത്യയിലെത്തിയിരിക്കുകയാണ്. ഫോർഡ് ഫ്രീസ്റ്റൈലിനെ ഫിഗോ ഹാച്ച്ബാക്കിനെ അടിസ്ഥാനപ്പെടുത്തിയാണ് ഇറക്കിയിരിക്കുന്നത്. ഒരു അഗ്രസീവ് ലുക്കാണ് ഫ്രീസ്റ്റൈൽ കൈവരിച്ചിരിക്കുന്നത്. ഔദ്യോഗിക അവതരണത്തിന് മുന്നോടിയായി ഫ്രീസ്റ്റൈലിന്റെ ചിത്രങ്ങൾ ക്യാമറയിൽ പതിഞ്ഞിരിക്കുകയാണ്. ഫോർഡിന്റെ ഗുരുഗ്രാം കോർപ്പറേറ്റ് ഓഫീസിൽ നിന്നുമാണ് ഈ ചിത്രങ്ങൾ പുറത്തുവിട്ടിരിക്കുന്നത്.
ഫോർഡിന്റെ മസിലൻ മസ്താങിൽ നിന്നും പ്രചോദനം കൊണ്ട ഗ്രില്ലാണ് ഫ്രീസ്റ്റൈലിന്റെ പ്രധാന ആകർഷണം. പിന്നിലേക്ക് വലിച്ചു നീട്ടിയ ഹെഡ് ലാമ്പ്, പുതുക്കിയ ബംബർ, സ്കിഡ് പ്ലേറ്റ്, ബ്ലാക് ക്ലാഡിങ് എന്നിവയാണ് പ്രധാന എക്സ്റ്റീരിയർ സവിശേഷതകൾ. ഫിഗോ ഹാച്ച്ബാക്കിനെ അനുസ്മരിപ്പിക്കുന്ന പിൻഭാഗമാണ് ഫ്രീസ്റ്റൈലിന് ലഭിക്കുന്നത്.
സുരക്ഷ ഉറപ്പുവരുത്താൻ 6 എയർബാഗുകൾ, എബിഎസ്, ഇബിഡി, ട്രാക്ഷൻ കൺട്രോൾ ഇലക്ട്രോണിക് സ്റ്റബിലിറ്റി കൺട്രോൾ തുടങ്ങിയ ക്രമീകരണങ്ങളും നടത്തിയിട്ടുണ്ട്. 6.5 ഇഞ്ച് ടച്ച്സ്ക്രീൻ സിസ്റ്റം, ആൻഡ്രോയ്ഡ് ഓട്ടോ, ആപ്പിൾ കാർപ്ലേ കണക്ടിവിറ്റി ഫീച്ചറുകൾ എന്നിവയാണ് അകത്തളത്തിലെ പ്രധാന സവിശേഷതകൾ. 1.2 ലിറ്റർ 3 സിലിണ്ടർ ഡ്രാഗൺ സീരീസ് പെട്രോൾ എൻജിൻ, 1.5 ലിറ്റർ ഡീസൽ എൻജിൻ എന്നിവയാണ് ഫ്രീസ്റ്റൈലിൽ ലഭിക്കുന്നത്.
