ന്യൂഡല്ഹി: കത്വവ പെണ്കുട്ടി പീഡനത്തിനിരയായിട്ടില്ല എന്ന പ്രചരണം തള്ളി ജമ്മു പോലീസ്. ഈ പ്രചരണം സത്യത്തില് നിന്നും ഏറെ അകലെയാണെന്ന് പോലീസ് വ്യക്തമാക്കി. പെണ്കുട്ടി പീഡനത്തിനിരയായിട്ടില്ലെന്നും ഇപ്പോള് പ്രതിപട്ടികയിലള്ളവരെ കുടുക്കുകയാണെന്നും ആരോപിക്കുന്ന വാര്ത്തകള് ചില മാധ്യമങ്ങളില് റിപ്പോര്ട്ട് ചെയ്തിരുന്നു. സാമൂഹ്യമാധ്യമങ്ങളില് ഇത്തരത്തില് വാദവുമായി ഒരു വീഡിയോയും പ്രചരിച്ചിക്കുന്നുണ്ട്. ഇതിനു പിന്നാലെയാണ് പ്രചരണം സത്യത്തിനു നിരക്കാത്തതാണെന്ന് വ്യക്തമാക്കിക്കൊണ്ട് ജമ്മു പോലീസ് പ്രസ്താവന പുറത്തിറക്കിയത്.
രണ്ടു പോലീസുകാരുള്പ്പെടെ എട്ടു പേര്ക്കെതിരെയാണ് കുറ്റം ചുമത്തിയിരിക്കുന്നത്. മാനഭംഗ കുറ്റം കെട്ടിച്ചമച്ചതാണെന്ന ആരോപണവും പിന്നാലെ ഉയര്ന്നിരുന്നു. ഈ സാഹചര്യത്തില് സിബിഐ അന്വേഷണം വേണമെന്നും ബിജെപി മുന് മന്ത്രിമാരുള്പ്പെടെ ആവശ്യം ഉയര്ത്തിയിരുന്നു.
മെഡിക്കല് രംഗത്തെ വിദഗ്ധരുടെ വിശകലനം വെച്ചാണു കുറ്റപത്രത്തില് മാനഭംഗക്കേസ് കൂടി ചേര്ത്തതെന്നും ജമ്മു പോലീസിന്റെ ക്രൈംബ്രാഞ്ച് പുറത്തിറക്കിയ പ്രസ്താവനയില് വ്യക്തമാക്കുന്നു.
