സിഡ്നി: അമ്മയോട് വഴക്കുപിടിച്ച് 12 കാരന് പയ്യന് പിണങ്ങിപ്പോയത് ഓസ്ട്രേലിയയില് നിന്നും ഇന്തോനേഷ്യയിലേക്ക്. ഇന്തോനേഷ്യന് ടൂറിസം കേന്ദ്രമായ ബാലിയിലേക്ക് പറന്ന പയ്യന് മാതാപിതാക്കളുടെ ക്രെഡിറ്റ് കാര്ഡ് ഉപയോഗിച്ച് ഹോട്ടലില് മുറിയെടുക്കുകയും വാട്ടര് സ്കൂട്ടര് വാടകയ്ക്ക് എടുത്ത് കടലില് കറങ്ങുകയും സ്വിമ്മിംഗ് പൂളില് കുളിച്ചും ബീയറടിച്ചും അടിച്ചു പൊളിച്ചു കഴിഞ്ഞത് നാലു ദിവസം. ഒടുവില് പയ്യന്റെ ഫോട്ടോ സാമൂഹ്യ മാധ്യമങ്ങളിലൂടെ കണ്ട ഒരു കൂട്ടുകാരന് പറഞ്ഞറിഞ്ഞ മാതാപിതാക്കള് തൊട്ടു പിന്നാലെ ഇന്തോനേഷ്യയിലേക്ക് പറന്നു വരികയും പയ്യനെ തിരിച്ച് വീട്ടിലേക്ക് കൂട്ടിക്കൊണ്ടു പോകുകയും ചെയ്തു.
സിഡ്നിക്കാരനാണ് പയ്യന്. വീട്ടില് നിന്നും ആദ്യം പശ്ചിമ ഓസ്ട്രേലിയന് നഗരമായ പെര്ത്തിലേക്ക് പറന്ന പയ്യന് അവിടെ നിന്നും ജെറ്റ് സ്റ്റാര് എയര്ലൈനില് ആണ് ബാലിയിലേക്കും പോയത്. നേരത്തേ അവധിക്കാലം ചെലവഴിക്കാന് കുടുംബത്തിനൊപ്പം പോയതിന്റെ അനുഭവപരിചയത്തില് നിന്നുമായിരുന്നു പയ്യന്റെ യാത്ര. നേരത്തേ ബാലിയില് അവധിക്ക് പോയിട്ടുണ്ടെങ്കിലും കൗമാരം കഴിയാത്ത മകന് തന്നത്താന് വിമാനം കയറി മറ്റൊരു രാജ്യത്തേക്ക് പറക്കുമെന്ന വിവരം മാതാപിതാക്കള് സ്വപ്നത്തില് അറിഞ്ഞില്ല. നാലു ദിവസത്തോളം പയ്യന് ബാലി ദ്വീപില് ചെലവഴിച്ചു. ഹോട്ടലില് മുറിയെടുക്ുകകയും സ്കൂട്ടര് വാടകയ്ക്ക് എടുക്കുയും ബീയര് കുടിക്കുകയുമെല്ലാം ചെയ്തു. ഒര സ്വിമ്മിംഗ് പൂളില് കളിക്കുന്നതിന്റെ പയ്യന് തന്നെ പുറത്തുവിട്ട വീഡിയോ കണ്ട കൂട്ടുകാരന് അറിയിച്ചപ്പോഴാണ് മാതാപിതാക്കള് ശരിക്കും ഞെട്ടിയത്. 6,100 ഡോളറാണ് അവധിക്കാലം അടിച്ചു പൊളിക്കാന് മാതാപിതാക്കളുടെ അക്കൗണ്ടില് നിന്നും ചൂണ്ടിയത്.
കുട്ടികളെ വിമാനയാത്ര ചെയ്യുന്നതില് ഒരു നിയന്ത്രണവുമില്ലാത്ത ഓസ്ട്രേലിയന് വിമാനയാത്ര സംബന്ധിച്ച നിയമത്തെയാണ് മാതാപിതാക്കള് പഴിക്കുന്നത്. മാര്ച്ച് 17 നാണ് പയ്യന് ബാലിയില് എത്തിയത്. മാര്ച്ച് 8 ന് പയ്യന് രാജ്യം വിടാന് പോകുന്നത് ശ്രദ്ധയില് പെട്ടിരുന്നതായി ഓസ്ട്രേലിയന് ഫെഡറല് പോലീസ് പറഞ്ഞു. പയ്യന് ബാലി ദ്വീപില് കഴിയുന്നതായി വാര്ത്ത പുറത്തുവന്ന മാര്ച്ച് 17 ന് തൊട്ടു പിന്നാലെ ഇന്തോനേഷ്യന് പോലീസ് പയ്യനെ കണ്ടെത്തുകയും വിവരം ഓസ്ട്രേലിയന് ഫെഡറല് പോലീസിനെ അറിയിക്കുകയൂം ചെയ്തു. തുടര്ന്ന് മാതാപിതാക്കള് ബാലിയിലേക്ക് പോകുകയും പയ്യനെ തിരിച്ചു കൊണ്ടുവരികയുമായിരുന്നു.
തനിക്ക് യാത്ര ചെയ്യാന് അപ്പനമ്മമാരുടെ അനുവാദം ആവശ്യമില്ലെന്നാണ് വിമാനം ജോലിക്കാരോട് പയ്യന് പറഞ്ഞത്. ഒരാള് കുറ്റക്കാരനോ സംശയാസ്പദമായ സാഹചര്യത്തിലുള്ള ആളോ അല്ലെങ്കില് പിന്നെ പാസ്പോര്ക്ക് ക്യാന്സല് ചെയ്യാനുള്ള അധികാരം തങ്ങള്ക്കില്ലെന്നാണ് ഫെഡറല് പോലീസ് പറഞ്ഞത്.
സംഭവം വിവാദമായതോടെ 12 വയസ്സിന് മുകളില് പ്രായമുള്ളവര്ക്ക് മാതാപിതാക്കളുടെ കൂടെയല്ലാതെ യാത്ര ചെയ്യാമെന്ന നിയമം മാറ്റാനൊരുങ്ങുകയാണ് ജെറ്റ് സ്റ്റാര്. ഓസ്ട്രേലിയന് നിയമം അനുസരിച്ച് അഞ്ചു വയസ്സില് താഴെയുള്ള കുട്ടികളെയാണ് വിമാനത്തില് തനിച്ചു യാത്ര ചെയ്യാന് അനുവാദമില്ലാത്തത്. അഞ്ചിനും 11 നും ഇടയില് പ്രായമുള്ളവര്ക്ക് ആരും കൂടെയില്ലാതെ മൈനര് ടിക്കറ്റും 12 നും 15 നും ഇടയില് മാതാപിതാക്കളില് നിന്നോ സംരക്ഷകനില് നിന്നോ പെര്മിഷന് സ്ളിപ്പും വേണ്ടതുണ്ട്. കൊച്ചു കുട്ടികള്ക്ക യാതൊരു തരത്തിലുമുള്ള യാത്രാ നിയന്ത്രണം ഇല്ലാത്ത രാജ്യത്ത് ഇതെല്ലാം നടക്കുമെന്ന് പയ്യന്റെ മാതാവ് എമ്മ പറഞ്ഞു.
