ന്യുഡല്ഹി: ഡല്ഹി എയിംസ് ആശുപത്രിയില് റസിഡന്റ് ഡോക്ടര്മാര് നടത്തുന്ന സമരം മൂന്നാം ദിവസത്തേക്ക് കടന്നു. ഒരു റസിഡന്റ് ഡോക്ടറെ ആശുപത്രിയിലെ മുതിര്ന്ന ഡോക്ടര് രോഗികളുടെ മുന്നില്വച്ച് അടിച്ചതില് പ്രതിഷേധിച്ചാണ് സമരം. ആരോപണ വിധേയനെ സസ്പെന്റ് ചെയ്യണമെന്നാണ് സമരക്കാരുടെ ആവശ്യം.
സമരം ശക്തമായതോടെ എമര്ജന്സി, ഐസിയു സര്വീസുകള് ഒഴികെയുള്ള മേഖലകള് ഏറെക്കുറെ സ്തംഭിച്ചിരിക്കുകയാണ്. പല ശസ്ത്രക്രിയകളും റദ്ദാക്കപ്പെട്ടു, ഒ.പി ക്ലിനിക്കുകള് നാമമാത്രമായാണ് പ്രവര്ത്തിക്കുന്നത്. സമരം പന്വലിക്കണമെന്ന എയിംസ് ഡയറക്ടര് റണ്ദീപ് ഗുലേറിയയുടെ അപേക്ഷ റസിഡന്റ് ഡോക്ടര്മാര് നിഷേധിച്ചു.
അതേസമയം, സംഭവത്തില് അന്വേഷണം നടക്കുന്നുണ്ടെന്നും അന്വേഷണം പൂര്ത്തിയാകും വരെ മുതിര്ന്ന ഡോക്ടറെ അവധിയില് പ്രവേശിച്ചതായും ഡയറക്ടര് വ്യക്തമാക്കി. മര്ദ്ദനത്തില് അദ്ദേഹം മാപ്പപേക്ഷയും നല്കിയിട്ടുണ്ട്. എന്നാല് സീനിയര് ഡോക്ടറെ അവധിയില് വിടുകയല്ല, സസ്പെന്റു ചെയ്യുകയാണ് വേണ്ടതെന്ന് റിസിഡന്റ് ഡോക്ടര്മാര് ആവശ്യപ്പെടുന്നു. അദ്ദേഹത്തെ സസ്പെന്റു ചെയ്യുന്നത് വരെ സമരം തുടരും.
മുന്പ് പത്മശ്രീയും ഡോ.ബി.സി റോയ് അവാര്ഡും നല്കി ആദരിച്ചിട്ടുള്ളയാളാണ് ആരോപണ വിധേയനായ ഡോക്ടര്. ഇദ്ദേഹത്തില് നിന്ന് പുരസ്കാരങ്ങള് തിരിച്ചുപിടിക്കണമെന്ന് ആവശ്യപ്പെട്ട് റസിഡന്റ് ഡോക്ടര്മാരുടെ അസോസിയേഷന് എയിംസ് പ്രസിഡന്റു കൂടിയായ ആരോഗ്യമന്ത്രി ജെ.പി നദ്ദയ്ക്ക് കത്ത് നല്കി. അത്തരം സമുന്നതമായ പുരസ്കാരങ്ങള് കൈവശം വയ്ക്കാന് അദ്ദേഹം അര്ഹനല്ലെന്ന് കത്തില് പറയുന്നു.
