മുംബൈ: കാമുകനെ പണം നല്കി സന്തോഷിപ്പിക്കുന്നതിനായി മൊബൈല് മോഷണം പതിവാക്കിയ കോളേജു കുമാരികള് അറസ്റ്റില്. ലോക്കല് ട്രെയിനിലെ വനിതാ കമ്പാര്ട്ട്മെന്റില് നിന്നും മൊബൈല് മോഷണം വ്യാപകമായതിനെ തുടര്ന്ന് നടത്തി രഹസ്യാന്വേഷണത്തില് ട്വിങ്കിള് സോണി എന്ന 20 കാരിയും ടിനാല് പാര്മര് എന്ന 19 കാരിയുമാണ് അറസ്റ്റിലായത്. ഇവര് മോഷ്ടിച്ചത് വന് വില വരുന്ന 38 സ്മാര്ട്ട്ഫോണുകളായിരുന്നു. കാമുകന് ഹൃഷി സിംഗ് വഴി ഫോണ് മറ്റൊരാളില് എത്തിച്ചായിരുന്നു ഇവര് പണം സമ്പാദിച്ചിരുന്നത്.
ഇരുവരുടെയും കാമുകനും ഫോണ് കൈമാറാന് ഇടനിലക്കാരനുമായിരുന്ന ഹൃഷി സിംഗ് എന്ന യുവാവും അറസ്റ്റിലായിട്ടുണ്ട്. ഇവരില് നിന്നും ഫോണ് വാങ്ങിയിരുന്ന രാഹുല് രാജ്പുരോഹിത് എന്ന 28 കാരനും അറസ്റ്റിലായിട്ടുണ്ട്. മൂന്ന് ലക്ഷം രൂപയോളം മൂല്യം വരുന്ന ഫോണുകളാണ് ഇവര് ഇതിനകം മോഷ്ടിച്ചത്. ബോറിവിലി - സാന്താക്രൂസ് സ്റ്റേഷനുകള്ക്കിടയില് പതിവായി മൊബൈല് ഫോണ് മോഷണം റിപ്പോര്ട്ട് ചെയ്യപ്പെട്ട സാഹചര്യത്തില് പോലീസ് രഹസ്യമായി കേസ് അന്വേഷിക്കാന് ഒരു ടീമിനെ നിയോഗിക്കുകയായിരുന്നു. പ്രാഥമിക അന്വേഷണം തന്നെ രണ്ടു കോളേജ് വിദ്യാര്ത്ഥിനികളിലേക്കും അവരുടെ കൂട്ടുകാരനിലേക്കും എത്തിയിരുന്നു.
അന്വേഷണത്തിന്റെ ഭാഗമായി യാത്രക്കാരുടെ വേഷത്തില് പോലീസുകാരികള് മെയ് 30 ന് തീവണ്ടിയില് കയറി. ട്രെയിന് കാന്ഡീവ്ലിയില് എത്തിയപ്പോള് തന്നെ സോണി കയ്യോടെ പിടിയിലായി. ഒരു യാത്രക്കാരിയുടെ ബാഗില് നിന്നും മൊബൈല് മോഷ്ടിക്കാന് കയ്യിടുമ്പോഴാണ് പിടിയലായത്. ഇത് രണ്ടാമത്തെ ആളിലേക്കും കാമുകനില് നിന്നും ഫോണ് വാങ്ങുന്നയാളിലേക്കും നയിച്ചു. ഏഴുകേസുകളിലെ പ്രതികളായിരുന്നു കാമുകനും ഫോണ് വാങ്ങുന്ന കച്ചവടക്കാരനും.
ആര്കിടെക്ചര് വിദ്യാര്ത്ഥിനിയാണ് സോണി. പാര്മറാകട്ടെ കോളേജിലെ ഡിഗ്രി ഒന്നാം വര്ഷ വിദ്യാര്ത്ഥിനിയും. കോളേജിലേക്കുള്ള യാത്രയ്ക്കിടയിലാണ് രണ്ടുപേരും ഫോണുകള് അടിച്ചു മാറ്റിയിരുന്നത്. പിടിച്ചപ്പോള് തന്നെ സോണിയുടെ ബാഗില് ഏഴിലധികം ഫോണുകള് ഉണ്ടായിരുന്നു. 38 ഫോണുകളും 30 മെമ്മറി കാര്ഡുകളുമാണ് ഇവരില് നിന്നും പിടിച്ചെടുത്തത്. രണ്ടുപേരും സിംഗുമായി പതിവായി സായാഹ്നങ്ങളില് നടത്തിയിരുന്ന കൂടിക്കാഴ്ചയിലാണ് ഫോണ് കൈമാറ്റം നടന്നിരുന്നത്. പെണ്കുട്ടികള്ക്ക് രണ്ടുപേര്ക്കും സിംഗിനോട് പ്രണയമായിരുന്നു. കാമുകന് നിര്ലോഭം പണം ചെലവഴിക്കാന് എളുപ്പം സമ്പാദ്യമുണ്ടാക്കാനുള്ള വഴിയായിരുന്നു പെണ്കുട്ടികള്ക്ക് മോഷണം.
