ചങ്ങനാശ്ശേരി : സ്വര്ണ്ണം മോഷ്ടിച്ചുവെന്ന കുറ്റാരോപണത്തെ തുടര്ന്ന് ദമ്പതികള് ജീവനൊടുക്കിയ സംഭവത്തില് തത്കാലം പരാതിക്കാരനെതിരെയോ ഇരുവരെയും പോലീസ് സ്റ്റേഷനിലേയ്ക്ക് വിളിച്ചു വരുത്തിയ എസ്.ഐയ്ക്കെതിരെയോ കേസെടുക്കില്ല. ദമ്പതികളുടെ പോസ്റ്റുമോര്ട്ടം റിപ്പോര്ട്ടില് പോലീസ് ഇവരെ മര്ദ്ദിച്ചതിന്റെ യാതൊരു സൂചനകളും കണ്ടെത്തിയിരുന്നില്ല. ഈ സാഹചര്യത്തില് ചങ്ങനാശ്ശേരി എസ്.ഐ ഷെമീര് ഖാനെതിരെ കേസെടുക്കാനാകില്ലെന്നാണ് അന്വേഷണ സംഘത്തിന്റെ വിലയിരുത്തല്.
ചങ്ങനാശ്ശേരി പുഴവാത് ഇല്ലംപള്ളില് ഇടവളഞ്ഞിയില് സുനില് കുമാര് (34), ഭാര്യ രേഷ്മ (24) എന്നിവരെ കഴിഞ്ഞ ബുധനാഴ്ചയാണ് പാണ്ടന്ചിറയിലുള്ള വാടകവീട്ടില് വിഷം കഴിച്ച് മരിച്ച നിലയില് കണ്ടെത്തിയത്. സ്വര്ണ്ണാഭരണ നിര്മ്മാണശാലയില് ജോലിക്കാരനായിരുന്നു മരിച്ച സുനില് കുമാര്. തന്റെ ഉടമസ്ഥതയിലുള്ള സ്വര്ണ്ണാഭവണ നിര്മ്മാണശാലയില് നിന്നും സുനില് കുമാര് സ്വര്ണ്ണം മോഷ്ടിച്ചുവെന്ന് പോലീസില് പരാതി നല്കിയത് ചങ്ങനാശ്ശേരി നഗരസഭയിലെ സിപിഎം വാര്ഡ് കൗണ്സിലറും അഭിഭാഷകനുമായ ഇ.എ സജികുമാറാണ്. തുടര്ന്നാണ് പോലീസ് സുനില് കുമാറിനെ ചോദ്യം ചെയ്യാന് വിളിപ്പിച്ചത്.
സജികുമാറാണ് തങ്ങളടെ മരണത്തിന് കാരണക്കാരെന്നും പരാതിയുടെ പേരില് പോലീസ് മാനസികമായും ശാരീരികമായും പീഡിപ്പിച്ചുവെന്നും ആത്മഹത്യാക്കുറിപ്പില് രേഖപ്പെടുത്തിയിരുന്നു.
