ന്യൂഡല്ഹി: ഇടതുപക്ഷം അധികാരത്തിലിരുന്ന കഴിഞ്ഞ 25 വര്ഷക്കാലത്ത് ആള്ക്കൂട്ട ആക്രമണങ്ങള് ത്രിപുരയില് ഉണ്ടായിട്ടില്ലെന്ന് മുന് മുഖ്യമന്ത്രി മണിക് സര്ക്കാര്. സര്ക്കാരിന് തങ്ങളുടെ വാഗ്ദാനങ്ങള് പാലിക്കാന് കഴിയാതെ പരാജയപ്പെടുമ്പോളാണ് ഇത്തരം സംഭവങ്ങളിലേക്ക് ജനശ്രദ്ധ തിരിക്കുന്നത്.
കുട്ടികളെ തട്ടിക്കൊണ്ടുപോകല്, ആള്ക്കൂട്ട കൊലപാതകങ്ങള്, പശുവിന്റെ പേരിലുള്ള ആക്രമങ്ങള് ഇവയെല്ലാം ജനശ്രദ്ധ തിരിക്കാനുള്ള ബിജെപിയുടെ കപട നാടകങ്ങളാണ്. സമൂഹത്തെ ജാതിയുടെയും മതത്തിന്റെയും അടിസ്ഥാനത്തില് രണ്ടു തട്ടുകളായി തിരിക്കാനാണ് ഇവരുടെ ശ്രമം. ജനങ്ങള് ബിജെപിക്കെതിരെ തിരിയുന്നത് അവരുടെ ഉള്ളില് ഭയം ഉളവാക്കുന്നുവെന്നും മണിക് സര്ക്കാര് ആരോപിച്ചു.
കേന്ദ്രസര്ക്കാരിനെ പോലെ തന്നെ തെരഞ്ഞടുപ്പ് സമയത്ത് നല്കിയ വാഗ്ദാനങ്ങള് പാലിക്കാന് ബിപ്ലബ് ദേബ് സര്ക്കാരിന് സാധിച്ചിട്ടില്ലെന്നും മണിക് സര്ക്കാര് കുറ്റപ്പെടുത്തി. ഇടതുപക്ഷത്തിന്റെ ആഭിമുഖ്യത്തില് കേന്ദ്രസര്ക്കാരിനെതിരെ ഡല്ഹിയില് നടന്ന പ്രതിഷേധ പരിപാടികളില് പങ്കെടുക്കാനെത്തിയപ്പോളാണ് മണിക് സര്ക്കാര് ബിജെപി സര്ക്കാരിനെതിരെ വിമര്ശനം ഉയര്ത്തിയത്.
