പത്തനംതിട്ട: മുക്കൂട്ടുതറയില് നിന്നും കാണാതായ ജസ്നയുടെ തിരോധാനവുമായി ബന്ധപ്പെട്ട് ജസ്നയുമായി അടുപ്പമുണ്ടായിരുന്നെന്നും അതിന്റെ പേരില് അടുത്ത ബന്ധു താക്കീത് ചെയ്തിരുന്നതായും ആണ്സുഹൃത്തിന്റെ വെളിപ്പെടുത്തല്. ജൂലൈ 31 ന് ഇയാളെ പോലീസ് 12 മണിക്കൂര് ചോദ്യം ചെയ്തിരുന്നെങ്കിലും തിരോധാനത്തില് തനിക്ക് ഒന്നുമറിയില്ലെന്ന് ഇയാള് മൊഴി നല്കിയതായി സൂചന.
ബന്ധു താക്കീത് ചെയ്ത ശേഷം ജസ്നയുടെ ഫോണ് എടുക്കാറില്ലായിരുന്നെന്നും കുടുംബത്തിന്റെ ഇടപെടല് ജസ്നയെ മാനസീകമായി തളര്ത്തിയിരിക്കാമെന്നും ഇയാള് പറഞ്ഞു. വീടുവിട്ടിറങ്ങിപ്പോ ജസ്ന എവിടെപ്പോയെന്നോ എന്തു സംഭവിച്ചു എന്നോ തനിക്കറിയില്ല. അതേസമയം ജസ്നയുടെ തിരോധാനവുമായി ബന്ധപ്പെട്ടുള്ള പോലീസ് അന്വേഷണം ബംഗലുരു വരെ എത്തി നില്ക്കുകയാണ്.
മുണ്ടക്കയത്തെ സിസിടിവി ദൃശ്യങ്ങള്ക്കപ്പുറം പോകാതെ കുഴയുകയാണ് പോലീസ്. സംശയം തോന്നിയ നമ്പരുകള് ക്രോഡീകരിച്ചുള്ള അന്വേഷണമാണ് നടക്കുന്നത്. സൈബര് വിദഗ്ദ്ധരുടെ നേതൃത്വത്തിലുള്ള പരിശോധന പുരോഗമിക്കുകയാണ്. അന്വേഷണ ചുമതല ഉണ്ടായിരുന്ന ഡിവൈഎസ്പി വിരമിച്ച സാഹചര്യത്തില് പുതിയ അന്വേഷണ ഉദ്യോഗസ്ഥനെ നിയോഗിച്ചിട്ടില്ല. ഇതിനിടയില് ജസ്ന രൂപമാറ്റം നടത്തിയിട്ടുണ്ടാകുമോ എന്ന സംശയവും പോലീസ് ഉയര്ത്തുന്നുണ്ട്.
