പട്ന : ആശുപത്രിയുടെ ശസ്ത്രക്രിയാ മുറിയില് തെരുവുനായ കയറി രോഗിയുടെ മുറിച്ചുമാറ്റിയ കാലുമായി ഓടിപ്പോയി. രാംനാഥ് മിശ്ര എന്നയാളുടെ കാലാണ് നായ കൊണ്ടു പോയത്. നീങ്ങിത്തുടങ്ങിയ ട്രെയിനില് കയറാന് ശ്രമിക്കവേ പിടി വിട്ട് മിശ്ര ട്രാക്കില് വീഴുകയായിരുന്നു. വലത്തേകാലിനു ഗുരുതരമായി പരുക്കേറ്റതിനെ തുടര്ന്നാണ് കാല് മുറിച്ചു നീക്കേണ്ടി വന്നത്.
ബക്സര് സദര് ആശുപത്രിയിലാണു സംഭവം നടന്നത്. ശസ്ത്രക്രിയയ്ക്കു ശേഷം രോഗിയുടെ മുറിവ് ഡോക്ടര്മാര് വൃത്തിയാക്കിക്കൊണ്ടിരിക്കെയാണ് നായ മുറിയില് നുഴഞ്ഞുകയറിയത്. ആശുപത്രി ജീവനക്കാര് പിന്നാലെ പാഞ്ഞെങ്കിലും നായ പിടികൊടുത്തില്ല. കേന്ദ്ര ആരോഗ്യ കുടുംബക്ഷേമ സഹമന്ത്രി അശ്വിനി കുമാര് ചൗബേ പ്രതിനിധീകരിക്കുന്ന മണ്ഡലത്തിലാണു സംഭവം. ബിഹാറിലെ മുന് ആരോഗ്യമന്ത്രി കൂടിയാണ് ചൗബേ. എല്ലും മാംസവും കടിച്ചു നില്ക്കുന്ന നായയുടെ ചിത്രം പിന്നീട് സമൂഹമാധ്യമങ്ങളില് വൈറലായി.
