തിരുവനന്തപുരം: തെരഞ്ഞെടുപ്പില് പ്രഖ്യാപിച്ച അഞ്ച് ഗ്യാരന്റികളില് ആദ്യത്തെ രണ്ടു ഗ്യാരന്റികള് നടപ്പാക്കുമെന്ന് മുഖ്യമന്ത്രി വി.ഡി. സതീശന്. ജൂണ് 15 മുതല് കെ.എസ്.ആര്.ടി.സിയില് സ്ത്രീകള്ക്ക് സൗജന്യയാത്ര ആരംഭിക്കുമെന്നും വയോജനങ്ങള്ക്കായി ഒരു പ്രത്യേക വകുപ്പ് രൂപീകരിക്കുമെന്നും പ്രഖ്യാപിച്ചു. ആശാസമരക്കാരുടെ ആവശ്യങ്ങള് അംഗീകരിച്ച് ഓണറേറിയം 3000 രൂപ കൂട്ടുമെന്നും പറഞ്ഞു.
ഇതോടെ ആശാവര്ക്കര്മാരുടെ ഓണറേറിയം 12,000 മായി കൂടും. അംഗന്വാടി ജീവനക്കാരുടെ കാര്യത്തില് 1000 രൂപ കൂടി കൂട്ടി നല്കും. സാമ്പത്തീക സ്ഥിതി മെച്ചപ്പെടുമ്പോള് കൂടുതല് കാര്യങ്ങള് ചെയ്യുമെന്നും പറഞ്ഞു. സംസ്ഥാനത്തെ പാചകത്തൊഴിലാളികളും 1000 രൂപ കൂട്ടി. പ്രീ പ്രൈമറി ടീച്ചേഴ്സ് ആയമാര് എന്നിവര്ക്കും 1000 രൂപ വര്ദ്ധിപ്പിച്ചു. നിയമസഭാ സമ്മേളനം മെയ് 21 നും 22 നുമായി നിയമസഭയുടെ സമ്മേളനം വിളിച്ചു ചേര്ക്കാന് ഗവര്ണറോട് ആവശ്യപ്പെട്ടു. മെയ് 29 ന് ഗവര്ണറുടെ നയപ്രഖ്യാപനം നടത്തും.
ജി സുധാകരന്റെ പ്രോടൈം സ്പീക്കറാകും. അഡ്വ. ജനറലാലി ജെയ്ജു ബാബുവിനെ തീരുമാനിച്ചു. ടി. അസഫലി ഡയറക്ടര് ജനറല് ഓഫ് പ്രോസിക്യൂഷനാകും. നവകേരളാസദസ്സിന്റെ ഭാഗമായി കോണ്ഗ്രസുകാരെ ആക്രമിച്ച സംഭവത്തില് പുനരന്വേഷണം നടത്തും. സ്പെഷ്യല് ഇന്വെസ്റ്റിഗേഷന് ടീമായിരിക്കും ഈ കേസ് അന്വേഷിക്കുക. മഴക്കാല പൂര്വ്വ പ്രവര്ത്തനങ്ങള്ക്കുള്ള നടപടിക്രമം വേഗത്തിലും മെച്ചത്തിലും നടപ്പാക്കും. ആദ്യ മന്ത്രിസഭായോഗത്തിന് ശേഷം നടത്തിയ വാര്ത്താസമ്മേളനത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്. ഇന്ന് വന് ജനാവലിയുടെയും രാഷ്ട്രീയ മത സാംസ്ക്കാരിക നേതാക്കളുടെയും സാന്നിദ്ധ്യത്തില് സത്യപ്രതിജ്ഞ ചെയ്ത് അധികാരമേറ്റിരുന്നു.
