ഫ്രഞ്ച് നിര്മ്മാതാക്കളായ പ്യൂഷോ വീണ്ടും ഇന്ത്യയിലേക്ക് എത്തുന്നു. ബിര്ല ഗ്രൂപ്പുമായി സഹകരിച്ചാണ് പ്യൂഷോ കാറുകളെ മാതൃകമ്പനിയായ പിഎസ്എ ഗ്രൂപ്പ് കൊണ്ടുവരിക. ഇത് ഇന്ത്യയിൽ പ്യൂഷോയുടെ മൂന്നാം അങ്കമാണ്. ഇക്കുറി കാറുകള് പ്രാദേശികമായി നിര്മ്മിച്ചു വില്ക്കാനാണ് പിഎസ്എ ഗ്രൂപ്പിന് പദ്ധതി. ഇതിന്റെ ഭാഗമായി ബിര്ല ഗ്രൂപ്പുമായി ചേര്ന്നു തമിഴ്നാട്ടില് പുതിയ ശാലയ്ക്ക് കമ്പനി തുടക്കമിട്ടു.
പുതിയ ഹൊസൂര് ശാലയില് നിന്നു എഞ്ചിനും ഗിയര്ബോക്സുകളും കമ്പനി നിര്മ്മിക്കും. 600 കോടി രൂപ നിക്ഷേപത്തില് ആണ് ഇത് പ്രവര്ത്തനമാരംഭിക്കുന്നത്. ഏകദേശം രണ്ടുവര്ഷമെടുത്തു പിഎസ്എയുടെ ഹൊസൂര് ശാല പൂര്ണ്ണ സജ്ജമാവാന്. ആദ്യഘട്ടത്തില് പ്രതിവര്ഷം രണ്ടുലക്ഷം ബിഎസ് VI എഞ്ചിനുകളും മൂന്നുലക്ഷം ഗിയര്ബോക്സുകളും ഉത്പാദിപ്പിക്കാനുള്ള ശേഷി ശാലയ്ക്കുണ്ടെന്നാണ് റിപ്പോർട്ട്. ഭാവിയില് പിഎസ്എ ഗ്രൂപ്പ് രൂപകല്പ്പന ചെയ്യുന്ന പുതിയ കാറുകള്ക്ക് ഇവിടെ നിന്നുള്ള എഞ്ചിനും ഗിയര്ബോക്സുമായിരിക്കും ലഭിക്കുക.
