ന്യൂഡല്ഹി: രാജ്യത്ത് അഭയാര്ത്ഥി കേന്ദ്രത്തില് നിന്നും വീണ്ടും ക്രൂര പീഡനത്തിന്റെ വാര്ത്തയാണ് പുറത്തുവരുന്നത്. അഭയ കേന്ദ്രങ്ങളിലെ ജീവനക്കാര് തന്നെ പെണ്കുട്ടികളെ ക്രൂരമായി ഉപദ്രവിക്കുന്ന വിവരമാണ് പുറത്തെത്തിയിരിക്കുന്നത്. ഡല്ഹിയിലെ അഭയകേന്ദ്രത്തിലാണ് ഞെട്ടിക്കുന്ന സംഭവം ഉണ്ടായത്.
ഡല്ഹി കമ്മീഷന് ഫോര് വുമണ് പെണ്കുട്ടികളുമായി നടത്തിയ സംഭാഷണത്തിലാണ് അഭയകേന്ദ്രത്തിലെ ക്രൂരതകള് പുറത്തു വന്നത്. തങ്ങളുടെ സ്വകാര്യ ഭാഗങ്ങളില് അഭയകേന്ദ്രത്തിലെ പെണ് ജീവനക്കാര് മുളകുപൊടി എറിയുമായിരുന്നെന്ന് പ്രായപൂര്ത്തിയായ പെണ്കുട്ടികള് വനിത കമ്മീഷനോട് പറഞ്ഞു. ശിക്ഷ നടപടിയായാണ് ഇത് ചെയ്തിരുന്നത്.
കുട്ടികളുടെ ചെറിയൊരു കുറ്റത്തിന് പോലും ഇവര് ക്രൂരമായ ശിക്ഷയാണ് നല്കിയിരുന്നത്. മാത്രമല്ല കുട്ടികളെ കൊണ്ട് ഇവര് പാത്രവും വസ്ത്രങ്ങളും കഴുകിക്കുകയും മുറിയും ശൗചാലയങ്ങളും വൃത്തിയാക്കിക്കുകയും ചെയ്തിരുന്നു. മാത്രമല്ല മതിയായ ജീവനക്കാരെ വയ്ക്കാതെ കുട്ടികളെ ഉപയോഗിച്ചാണ് പണി ഏറെയും ചെയ്യിച്ചിരുന്നത്.
ജീവനക്കാരെ അനുസരിക്കാതിരിക്കുകയോ മുറി വൃത്തിയാക്കാതിരിക്കുകയോ ചെയ്താല് അവര് തങ്ങളെ ക്രൂരമായി മര്ദ്ദിക്കാറുണ്ടായിരുന്നെന്ന് കുട്ടികള് പറഞ്ഞു. 22 പെണ്കുട്ടികള്ക്കും ജീവനക്കാര്ക്കുമായി ഒരു പാചകക്കാരന് മാത്രമാണുള്ളത്. ഭക്ഷണത്തിന് നിലവാരം തീരെയില്ലെന്നും കുട്ടികള് പറഞ്ഞതായി വനിത കമ്മീഷന് പറഞ്ഞു. അവധി സമയത്ത് പോലും വീട്ടില് പോകുവാനുള്ള അനുവാദം കുട്ടികള്ക്കുണ്ടായിരുന്നില്ല.
അഭയകേന്ദ്രത്തിലെ ക്രൂരത പുറത്തെത്തിയതോടെ പെണ്കുട്ടികളെ മുഴുവന് ഡല്ഹി പോലീസിന്റെ സംരക്ഷണയില് മറ്റൊരു കെട്ടിടത്തിലേക്ക് മാറ്റി. ജീവനക്കാരെ പോലീസ് കസ്റ്റഡിയില് എടുത്തിട്ടുണ്ടെന്നാണ് വിവരം.
