ചെന്നൈ: തമിഴ്നാട്ടില് എല്ലാ റേഷന് കാര്ഡ് ഉടമകള്ക്കും 1000 രൂപ വീതം പൊങ്കല് സമ്മാനം നല്കാനുള്ള സര്ക്കാര് തീരുമാനത്തില് കൈകടത്തി മദ്രാസ് ഹൈക്കോടതി. പൊങ്കല് സമ്മാനം ദാരിദ്ര്യരേഖയ്ക്കു താഴെയുള്ളവര്ക്ക് മാത്രം നല്കിയാല് മതിയെന്ന് കോടതി നിര്ദേശിച്ചു.
സാമ്പത്തിക സ്ഥിതി പരിശോധിക്കാതെ എന്തിനാണ് എല്ലാ റേഷന് കാര്ഡ് ഉടമകള്ക്കും 1000 രൂപ വീതം പൊങ്കല് സമ്മാനം നല്കുന്നതെന്ന് കോടതി ആരാഞ്ഞു. ഇത് സര്ക്കാരിന്റെ പണമാണ്. പാര്ട്ടി ഫണ്ടല്ലെന്നും കോടതി പറഞ്ഞു. സര്ക്കാര് തീരുമാനം ചോദ്യം ചെയ്തുള്ള പൊതുതാല്പര്യ ഹര്ജിയിലാണ് കോടതിയുടെ ഇടപെടല്.
പൊങ്കല് ഉത്സവത്തിന് എല്ലാ കുടുംബത്തിനും 1000 രൂപ വീതം നല്കുമെന്ന് ഈ മാസം രണ്ടിനാണ് സര്ക്കാര് പ്രഖ്യാപിച്ചത്. സംസ്ഥാനത്ത് 2.01 കോടി റേഷന് കാര്ഡ് ഉടമകള് ഉണ്ടെന്നാണ് കണക്ക്. മന്ത്രിമാരുടെയും മറ്റും നേതൃത്വത്തില് പണം വിരണവും ആരംഭിച്ചിരുന്നു. പൊങ്കല് ഉണ്ടാക്കുന്നതിനുള്ള സാധനങ്ങള് അടങ്ങിയ കിറ്റിനൊപ്പമാണ് പണം നല്കിയത്.
എന്നാല് സംസ്ഥാനത്തിന്റെ സാമ്പത്തിക സ്ഥിതി പരിഗണിക്കാതെയാണ് സര്ക്കാര് ഇത്തരമൊരു തീരുമാനമെടുത്തിരിക്കുന്നതെന്നും സംസ്ഥാനത്തിന്റെ പൊതുകടം ിതിനകം കുതിച്ചുയര്ന്നിട്ടുണ്ടെന്നും ഗജ ചുഴലിക്കാറ്റ് ബാധിത മേഖലയുടെ പുനരുദ്ധാരണം ഉള്പ്പെടെയുള്ളവയ്ക്ക് ഈ ഫണ്ട് വിനിയോഗിക്കണമെന്നുമായിരുന്നു ഹര്ജിക്കാരന് ഡാനിയല് യേശുദാസ് ചൂണ്ടിക്കാട്ടിയത്.
സര്ക്കാരിന്റെ കറന്റ് നികുതി വരുമാനം 1,12,616 കോടിയാണെന്നും മൊത്തും ബാധ്യത 3,55,845 കോടി രൂപയാണെന്നും വിവരാവകാശ രേഖപ്രകാരം വ്യക്തമാകുന്നുവെന്നും ഹര്ജിക്കാരന് ചൂണ്ടിക്കാട്ടി.
സാമ്പത്തികമായി താഴെതട്ടിലുള്ളവര്ക്ക് സഹായം നല്കുന്നതില് തനിക്ക് എതിര്പ്പില്ലെന്നും എല്ലാ റേഷന് കാര്ഡ് ഉടമകള്ക്കും നല്കുന്നതിനെയാണ് എതിര്ക്കുന്നതെന്നും ഹര്ജിയില് പറഞ്ഞിരുന്നു. ഖജനാവിനുണ്ടാകുന്ന അധിക ബാധ്യ ജനങ്ങളുടെ ചുമലിലേക്ക് വരുന്ന ഭാരമാണെന്നും ഡാനിയല് പറയുന്നു.
