ന്യൂഡല്ഹി: പ്രധാനമന്ത്രി നരേന്ദ്രമോഡിയെയും ബിജെപിയെയും പ്രമോട്ട് ചെയ്യുവാന് വേണ്ടി മാത്രം ഉപയോഗിക്കുന്ന നമോ ടി വിയ്ക്ക് ഇലക്ഷന് കമ്മീഷന്റെ വിലക്ക്. തെരഞ്ഞെടുപ്പ് നടക്കുന്നതിനിടയില് കമ്മീഷന്റെ അനുമതിയില്ലാതെ ബിജെപി അനുകൂല വിഷയങ്ങളോ പ്രധാനമന്ത്രിയുടെ പ്രസംഗങ്ങളോ സംപ്രേഷണം ചെയ്യുന്നത് വിലക്കി. ഇക്കാര്യത്തില് ഇതുവരെ ചെയ്തിട്ടുളളതും പ്രചരിക്കുന്നതുമായ എല്ലാ പരിപാടികളും എടുത്തു മാറ്റാന് ഡല്ഹി ഇലക്ട്രല് ഓഫീസര്ക്ക് നിര്ദേശം നല്കി. പ്രധാനമന്ത്രി നരേന്ദ്രമോഡി സിനിമയ്ക്ക് നിരോധനം ഏര്പ്പെടുത്തിയതിന് പിന്നാലെയാണ് നമോ ചാനലിനും നിയന്ത്രണം കൊണ്ടു വന്നിരിക്കുന്നത്.
ചാനലിനെതിരേ കോണ്ഗ്രസും ആംആദ്മിപാര്ട്ടിയുമാണ് പ്രതിഷേധവുമായി രംഗത്ത വന്നത്. ചാനല് തെരഞ്ഞെടുപ്പ് പെരുമാറ്റച്ചട്ടം ലംഘിക്കുന്നതാണെന്ന് അവര് ചൂണ്ടിക്കാട്ടി. അതേസമയം നമോടിവി യുടെ ലോഗോയും നമോ ആപ്പും നേരത്തേ അംഗീകരിച്ചതാണെന്നും എന്നാല് നരേന്ദ്രമോഡിയുടെ പഴയ പ്രസംഗങ്ങള് ഉപയോഗിക്കുന്ന കാര്യത്തില് വ്യക്തത വരുത്തിയിട്ടില്ലെന്നും ഡല്ഹി ചീഫ് ഇലക്ട്രല് ഓഫീസര് വ്യക്തമാക്കി. കഴിഞ്ഞമാസം സംപ്രേഷണം തുടങ്ങിയ നമോ ടിവി പ്രതിപക്ഷത്തിന്റെ വലിയ പ്രതിഷേധത്തിന് ഇരയായിരുന്നു.
അതേസമയം പ്രധാനമന്ത്രിയുടെ ചിത്രവും ലോഗവും ഉപയോഗിച്ചിട്ടള്ള ചാനലിന് ലൈസന്സ് ആവശ്യമില്ലെന്ന നിലപാടിലാണ് സര്ക്കാര്. നേരത്തേ പ്രധാനമന്ത്രിയുടെ ജീവചരിത്രം പറയുന്ന പി എം നരേന്ദ്രമോഡി എന്ന സിനിമയ്ക്ക് നിരോധനം ഏര്പ്പെടുത്തിയിരുന്നു. സിനിമ റിലീസ് ചെയ്യുന്നതിന്റെ തലേദിവസമാണ് നിരോധനം വന്നത്. ദേശീയ തെരഞ്ഞെടുപ്പ് നടക്കുന്ന മെയ് 19 വരെ തെരഞ്ഞെടുപ്പിന് ബുദ്ധിമുട്ടുണ്ടാക്കുന്ന ഒരു കാര്യവും ചെയ്യേണ്ടതില്ല എന്നായിരുന്നു തീരുമാനം. പ്രധാനമന്ത്രിയുടെ പ്രസംഗങ്ങളും ബിജെപി റാലിയും സംപ്രേഷണം ചെയ്യരുതെന്നാണ് ചാനലിന് നലകിയിരിക്കുന്ന നിര്ദേശം.
നമോ ചാനലിനും പിഎം നരേന്ദ്രമോഡിക്കും പുറമേ രാഷ്ട്രീയ നേതാക്കന്മാരുടെ ജീവിതം പറയുന്ന ചില തെലുങ്ക് സിനിമകള്ക്കും റിലീസിംഗിന് നിരോധനം ഏര്പ്പെടുത്തിയിട്ടുണ്ട്. മുന് ആന്ധ്രാമുഖ്യമന്ത്രി എന് ടി രാമറാവുവിന്റെ ജീവിതവും തെലുങ്കാന മുഖ്യമന്ത്രി കെ ചന്ദ്രശേഖര് റാവുവിന്റെ ജീവിതം പറയുന്ന ലക്ഷ്മിയുടെ എന്ടിആര്, ഉദ്യാമ സിംഹം എന്നീ സിനിമകളും അടുത്തൊരു ഉത്തരവ് ഉണ്ടാകുന്നത് വരെ റിലീസ് ചെയ്യരുതെന്ന് കമ്മീഷന് ഉത്തരവ് നല്കിയിട്ടുണ്ട്.
