ന്യൂഡല്ഹി: തന്റേതായ രീതിയില് ബിജെപി നേതാക്കള്ക്കെതിരേ 'പണി' കൊടുക്കാറുള്ള കോണ്ഗ്രസിന്റെ സാമൂഹ്യമാധ്യമം തലൈവിയും നേതാവും മുന് തെന്നിന്ത്യന് നടിയുമായ ദിവ്യാ സ്പന്ദന വീണ്ടും വിവാദവുമായി രംഗത്ത്. ഇത്തവണ ഹിറ്റ്ലറുടെയും നരേന്ദ്രമോഡിയുടെയും ചിത്രങ്ങള് ചേര്ത്ത് വെച്ച് താരം നടത്തിയ ട്വീറ്റ് ട്വിറ്ററില് പൊരിയുകയാണ്. ഒരേപോലെ പോസ് ചെയ്ത് വിവാദ നായകനും ഇന്ത്യന് പ്രധാനമന്ത്രിയും നില്ക്കുന്ന ചിത്രം അനേകര് ഏറ്റെടുത്തിരിക്കുകയാണ്.
ഒരു പെണ്കുട്ടിയുടെ ചെവിയില് പിടിച്ചു നില്ക്കുന്ന നാസി തലവന്റെ ചിത്രവും ഒരു നീഗ്രോ ബാലന്റെ ചെവിയില് പിടിച്ചു നില്ക്കുന്ന മോഡിയുടെ ചിത്രവും ചേര്ത്തു വെച്ച് 'നിങ്ങള്ക്ക് എന്തു ചിന്തിക്കുന്നു ?' എന്ന തലക്കെട്ടോടെയാണ് നല്കിയിരിക്കുന്നത്. സംഭവം പോസ്റ്റ് ചെയ്തപ്പോള് തന്നെ 500 റീ ട്വീറ്റുകളും 1,700 ലൈക്കുകളുമാണ് ചിത്രത്തിന് കിട്ടിയത്. കലി കയറിയ മോഡി ആരാധകര് സ്പന്ദനയെയും കോണ്ഗ്രസിനെയും രാഹുല്ഗാന്ധിയെയും രൂക്ഷമായി വിമര്ശിച്ചു.
അതേസമയം ചിത്രത്തിലെ ഹിറ്റ്ലറിന്റെ ഫോട്ടോ തന്നെ ഫോട്ടോഷോപ്പില് കൃത്രിമമായി ചമച്ചതാണെന്ന് വാദിച്ചവര് ഏറെയാണ്. ഒരു വെളുത്ത വര്ഗ്ഗക്കാരിയായ പെണ്കുട്ടിയുടെ കയ്യില് പിടിച്ചു നില്ക്കുന്ന ഹിറ്റ്ലറുടെ ചിത്രം ഫോട്ടോഷോപ്പ് ഉപയോഗിച്ച് ചെവിയില് പിടിക്കുന്നതാക്കി മാറ്റിയിരിക്കുകയാണെന്നാണ് ചിലര് പറയുന്നത്. ട്വീറ്റ് ചെയ്യും മുമ്പ് വിളിച്ച ഫോട്ടോ ശരിയാണോ ഫോട്ടോഷോപ്പില് ചെയ്തതാണോ എന്ന് പരിശോധന നടത്തുകയെങ്കിലും വേണമെന്നാണ് ഒരാള് പ്രതികരിച്ചത്. എന്നാല് രസകരമായ ചിത്രം എന്ന പേരില് ദിവ്യാസ്പന്ദനയെ പിന്തുണച്ചും അനേകര് രംഗത്തു വന്നിട്ടുണ്ട്. നരേന്ദ്രമോഡിയുടെ ചിത്രം വിദേശ പര്യടനത്തിനിടയില് ഒരു നീഗ്രോ ബാലന്റെ ചെവിയില് പിടിച്ച നിലയിലാണ്.
അതേസമയം ബിജെപി നേതാക്കളെയും പ്രധാനമന്ത്രിയെയും പരിഹസിച്ചുള്ള ദിവ്യയുടെ പോസ്റ്റുകള് മുമ്പും വിവാദമുണ്ടാക്കിയിട്ടുണ്ട്. കഴിഞ്ഞ നവംബറില് സര്ദാര് വല്ലഭായി പട്ടേലിന്റെ പ്രതിമയ്ക്ക് സമീപം നില്ക്കുന്ന മോഡിയുടെ ചിത്രം നല്കി പക്ഷിയാണോ എന്ന രീതിയില് പരിഹസിച്ചിരുന്നു. കഴിഞ്ഞ വര്ഷം മാര്ച്ചില് മോഡിയെ 'വിഡ്ഡി' എന്ന് പരിഹസിച്ചതും ദിവ്യയെ വിവാദത്തിലാക്കിയിരുന്നു.
