ന്യുഡല്ഹി: റഫാല് കേസില് വിധിയെത്താന് തെരഞ്ഞെടുപ്പ് കഴിയും. കേസിലെ പുനഃപരിശോധനാ ഹര്ജിയില് വിധി പറയുന്നത് സുപ്രീം കോടതി രണ്ടാഴ്ചത്തേക്ക് മാറ്റി. കോണ്ഗ്രസ് അധ്യക്ഷന് രാഹുല് ഗാന്ധിക്കെതിരായ കോടതിയലക്ഷ്യ ഹര്ജിയിലും വിധി മാറ്റിവച്ചു. കേസിലെ വാദങ്ങള് രണ്ടാഴ്ചയ്ക്കകം സമര്പ്പിക്കാനും കോടതി നിര്ദേശിച്ചു.
റഫാല് യുദ്ധവിമാനങ്ങളുടെ ഇടപാട് ചോദ്യം ചെയ്ത് സമര്പ്പിച്ച ഹര്ജികള് ഡിസംബര് 14ന് സുപ്രീം കോടതി തള്ളിയിരുന്നു. ഇതില് സമര്പ്പിച്ച പുനഃപരിശോധന ഹര്ജിയിലാണ് കോടതി നിലപാട് അറിയിച്ചത്. മുന് ബി.ജെ.പി നേതാവ് യശ്വന്ത് സിന്ഹ, അരുണ് ഷൂരി, പ്രശാന്തി ഭൂഷണ് എന്നിവരാണ് ഹര്ജിക്കാര്.
അനുകൂല വിധി ലഭിക്കാന് കേന്ദ്രസര്ക്കാര് കോടതിയെ തെറ്റിദ്ധരിപ്പിച്ചുവെന്നും കബളിപ്പിച്ചുമാണ് അനുകൂല വിധി സമ്പാദിച്ചതെന്ന് ഹര്ജിക്കാര് വാദിച്ചു.
അതേസമയം, കോടതിയലക്ഷ്യ കേസില് രാഹുല് ഗാന്ധി നടത്തിയ മാപ്പുപറച്ചില് മതിയാവില്ലെന്ന് പരാതിക്കാരിയായ മീനാക്ഷി ലേഖി എം.പിയുടെ അഭിഭാഷകന് ചൂണ്ടിക്കാട്ടി. രാഹുല് പരസ്യമായി മാപ്പുപറയണം. എന്നാല് കോണ്ഗ്രസ് അധ്യക്ഷന് തന്റെ രാഷ്ട്രീയ നിലപാട് ആണ് പറഞ്ഞതെന്നും തെറ്റായ ആരോപണത്തിനാണ് സുപ്രീം കോടതിയോട് മാപ്പുപറഞ്ഞതെന്നും രാഹുല് ഗാന്ധിയുടെ അഭിഭാഷകന് അഭിഷേക് മനു സിംഗ്വി തിരിച്ചടിച്ചു.
