കൊല്ക്കത്ത: ബിജെപിയുമായി തുറന്ന യുദ്ധത്തില് ഏര്പ്പെട്ടിരിക്കുന്ന ബംഗാള് മുഖ്യമന്ത്രി മമതാബാനര്ജിയെ ആക്രമിച്ച് ബിജെപി എംപി സാക്ഷി മഹാരാജ്. 'ജയ് ശ്രീറാം' മുദ്രാവാക്യത്തിനെതിരേ ഗൂഡാലോചന നടത്തുന്ന മമതാ ബാനര്ജി 'അസുരന് ഹിരണ്യ കശ്യപു' വിന്റെ കുടുംബത്തില് പെട്ടയാളെന്നായിരുന്നു പ്രതികരണം. 'ജയ് ശ്രീറാം' വിളിയെ ബിജെപി പശ്ചിമബംഗാളില് കലാപം സൃഷ്ടിക്കാന് ഉപയോഗിക്കുന്നെന്നും രാഷ്ട്രീയത്തില് മതം കലര്ത്തി മുതലെടുപ്പിന് ശ്രമിക്കുകയാണെന്നുമുള്ള മമതയ്ക്കുള്ള മറുപടിയായി പറഞ്ഞു.
'ജയ് ശ്രീറാം' എന്ന് വിളിച്ചിരുന്ന മകന് പ്രഹ്ളാദനെ ഹിരണ്യ കശ്യപു ജയിലില് അടച്ചെന്നും അതേ കാര്യം ബംഗാളില് ആവര്ത്തിക്കുന്ന മമത 'ജയ് ശ്രീറാം' വിളികള്ക്കെതിരേ ഗൂഡാലോചന നടത്തുന്ന ഹിരണ്യ കശ്യപുവിന്റെ കുടുംബത്തില് നിന്നും വന്നയാളാണ്. 'ജയ് ശ്രീറാം' വിളികള് ഉയര്ത്തുന്നവരെ ജയിലില് അയയ്ക്കുകയാണ്. തെരുവുകളിലും ഗലികളിലും ഇത് വിളിക്കുന്നവര് മമതയെ നേരിടേണ്ടി വരുമെന്നും സാക്ഷി മഹാരാജ് പറയുന്നു. അസുരരാജാവായ ഹിരണ്യ കശ്യപു വിഷ്ണുഭക്തനായ മകന് പ്രഹ്ളാദനെ വിഷ്ണു സ്തുതിയുടെ പേരില് ജയിലില് അടച്ചെന്ന പുരാണത്തെ പരാമര്ശിച്ചാണ് സാക്ഷിയുടെ വിമര്ശനം.
ബംഗാളിലെ രാഷ്ട്രീയ കൊലപാതകങ്ങള്ക്ക് പിന്നില് മമതയാണെന്ന് മോഡി കള്ളത്തരം പ്രചരിപ്പിക്കുന്നു എന്നാരോപിച്ച് നരേന്ദ്രമോഡിയുടെ സ്ഥാനാരോഹണ ചടങ്ങില് നിന്നും മമതാബാനര്ജി വിട്ടു നിന്നിരുന്നു. ഇതിനൊപ്പം 'ജയ് ശ്രീറാം' വിളികള് ബംഗാളില് മത സ്പര്ദ്ധ വളര്ത്താനും അസ്വസ്ഥതയുണ്ടാക്കാനും കലാപം സൃഷ്ടിക്കാനും ബിജെപി ആയുധമാക്കുന്നെന്നും മമതാബാനര്ജി ഫേസ്ബുക്ക് പോസ്റ്റിലൂടെ പറഞ്ഞിരുന്നു. അക്രമത്തിലൂടെയും കലുഷിതാവസ്ഥ സൃഷ്ടിച്ചും ബിജെപി നടത്തുന്ന വിദ്വേഷ പ്രചരണത്തെ ഒരുമിച്ച് തടയണമെന്നും പറഞ്ഞിരുന്നു.
അതിനിടയില് 'ജയ് ശ്രീറാം' എന്നെഴുതിയ 10 ലക്ഷം പോസ്റ്റുകാര്ഡുകള് അയയ്ക്കുമെന്ന് ബിജെപി നിയമസഭാംഗം അര്ജുന് സിംഗ് മമതയെ ഭീഷണിപ്പെടുത്തി. വ്യാഴാഴ്ച നടന്ന നോര്ത്ത് 24 പര്ഗാന ജില്ലാ സന്ദര്നെത്തിനിടയില് ക്രിമിനലുകളെന്നും പുറത്ത് നിന്നുള്ളവരെന്നും ബിജെപിക്കാരെ മമതാ ആക്ഷേപിച്ചിരുന്നു. ഇതിന് മറുപടിയായിട്ടായിരുന്നു അര്ജുന് സിംഗിന്റെ ഭീഷണി.
അതേസമയം വിവാദപ്രസ്താവനകള് നടത്തുന്ന കാര്യത്തില് ചരിത്രം സൃഷ്ടിച്ചിട്ടുള്ള സാക്ഷി മഹാരാജ് മുമ്പും ഞെട്ടിക്കുന്ന പരാമര്ശങ്ങള് നടത്തിയിട്ടുണ്ട്. ലോക് സഭാ തെരഞ്ഞെടുപ്പില് തനിക്ക് വോട്ടു ചെയ്തില്ലെങ്കില് 'പാപം' ഉണ്ടാകുമെന്ന് പറഞ്ഞ് സാക്ഷി വോട്ടുപിടിച്ചത് വിവാദമായിരുന്നു. തനിക്കെതിരേ പാര്ട്ടി എന്തെങ്കിലും തീരുമാനം എടുത്താല് ജനങ്ങള്ക്ക് വേദനയുണ്ടാകുമെന്നും അതിന്റെ ഫലം വളരെ മോശമായിരിക്കുമെന്ന് സ്വന്തം പാര്ട്ടിയെ വരെ ഭീഷണിപ്പെടുത്തുകയും ചെയ്തു. ഹിന്ദു ക്ഷേത്രം തകര്ത്ത് നിര്മ്മിച്ചതാണ് ഡല്ഹിയിലെ ജുമാ മസ്ജിദെന്നും അത് തകര്ത്തു കളയണമെന്നും നേരത്തേ സാക്ഷി മഹാരാജ് പറഞ്ഞിരുന്നു.
