ആല്വാര്: രാജസ്ഥാനിലെ ആല്വാറില് ഗോസംരക്ഷകര് മര്ദ്ദിച്ചുകൊന്ന പെഹ്ലു ഖാനെ പ്രതിയാക്കി പശുക്കടത്ത് കേസില് കുറ്റപത്രം സമര്പ്പിച്ച കോണ്ഗ്രസ് സര്ക്കാരിന്റെ നടപടിക്കെതിരെ വിമര്ശനം ശക്തമാകുന്നു. പിതാവിനെ പ്രതിയാക്കി പശുക്കടത്ത് കേസില് കുറ്റപത്രം സമര്പ്പിച്ച സര്ക്കാര് നടപടി ആശ്ചര്യജനകമാണെന്ന് പെഹ്ലു ഖാന്റെ മകന് ഇര്ഷാദ് പ്രതികരിച്ചു.
കോണ്ഗ്രസ് സര്ക്കാരില് നിന്ന് നീതി ലഭിക്കുമെന്ന് പ്രതീക്ഷിച്ചു. എന്നാല് ലഭിച്ചത് കുറ്റപത്രമാണ്. കുറ്റപത്രം ഒട്ടും പ്രതീക്ഷിച്ചതല്ല. കോണ്ഗ്രസ് സര്ക്കാര് അധികാരത്തില് വന്നപ്പോള് തങ്ങള്ക്കെതിരായ കേസ് റദ്ദാക്കുമെന്നാണ് പ്രതീക്ഷിച്ചത്. എന്നാല് ലഭിച്ചത് കുറ്റപത്രമാണെന്നും ഇര്ഷാദ് പറഞ്ഞു.
കഴിഞ്ഞ ഡിസംബറില് കോണ്ഗ്രസ് സര്ക്കാര് അധികാരത്തില് വന്നതിന് തൊട്ടുപിന്നാലെയാണ് പെഹ്ലു ഖാനെ പ്രതിയാക്കി കുറ്റപത്രം തയ്യാറാക്കിയത്. ബെഹ്രൂര് അഡീഷണല് ചീഫ് ജുഡീഷ്യല് മജിസ്ട്രേറ്റ് കോടതിയില് മെയ് 29നാണ് കുറ്റപത്രം സമര്പ്പിച്ചത്.
2017 ഏപ്രില് ഒന്നിനാണ് പെഹ്ലു ഖാനെ അക്രമികള് തല്ലിക്കൊന്നത്. കാലിച്ചന്തയില് നിന്ന് പശുവിനെ വാങ്ങിക്കൊണ്ടുവരികയായിരുന്ന പെഹ്ലു ഖാനെ പശുക്കടത്ത് ആരോപിച്ച് ഗോസംരക്ഷണ അക്രമികള് തല്ലിക്കൊല്ലുകയായിരുന്നു. എന്നാല് പശുക്കടത്ത് ആരോപിച്ച് ബി.ജെ.പി സര്ക്കാര് എടുത്ത കേസില് കുറ്റപത്രം സമര്പ്പിക്കുകയാണ് കോണ്ഗ്രസ് സര്ക്കാര് ചെയ്തിരിക്കുന്നത്.
