ന്യുഡല്ഹി: വിദേശ ഫണ്ടിംഗ് ചട്ടങ്ങള് ലംഘിച്ചുവെന്ന കേസില് സുപ്രീം കോടതിയിലെ പ്രമുഖ അഭിഭാഷക ദമ്പതികളായ ഇന്ദിര ജെയ്സിംഗിന്റെയും ആനന്ദ് ഗ്രോവറുടെയും വസതിയില് സി.ബി.ഐ റെയ്ഡ്. ഇവരുടെ എന്ജിഒ ആയ ലോയേഴ്സ് കളക്ടീവിലേക്ക് ചട്ടം ലംഘിച്ച് ഫണ്ട് സ്വീകരിച്ചുവെന്നാണ് ആക്ഷേപം. ഇവരുടെ 54-നിസാമുദീന് ഈസ്റ്റിലെ വസതിയിലും ലോയേഴ്സ് കളക്ടീവിന്റെ സി-65 നിസാമുദീന് ഈസ്റ്റിലെ ഓഫീസിലുമാണ് റെയ്ഡ്.
ഫോറിന് കോണ്ട്രിബ്യൂഷന് (റെഗുലേഷന്) ആക്ട് ലംഘിച്ചുവെന്ന് കാണിച്ച് ലോയേഴ്സ് കളക്ടീവിനെതിരെ ജൂണ് 18ന് സി.ബി.ഐ ക്രിമിനല് കേസ് എടുത്തിരുന്നു. ആഭ്യന്തര മന്ത്രാലയം നല്കിയ പരാതിയുടെ അടിസ്ഥാനത്തിലായിരുന്നു നടപടി. എന്ജിഒയുടെ പേരില് സ്വീകരിച്ച സഹായം ഉപയോഗിച്ചതില് വൈരുദ്ധ്യമുണ്ടെന്ന് ചൂണ്ടിക്കാട്ടിയായിരുന്നു പരാതി.
ലോയേഴ്സ് കളക്ടീവിന്റെ ട്രസ്റ്റിയും ഡയറക്ടറുമാണ് ആനന്ദ് ഗ്രോവര്. ഈ സംഘടനയില് ഭാരവാഹികളും പ്രവര്ത്തകരുമായ ഏതാനും പേര്ക്കെതിരെയും അജ്ഞാതരായ ചില സ്വകാര്യ വ്യക്തികള്ക്കും പൊതുപ്രവര്ത്തകര്ക്കും എതിരെയാണ് കേസ് രജിസ്റ്റര് ചെയ്തിരിക്കുന്നത്.
1981ല് രുപീകരിച്ചതാണ് ലോയേഴ്സ് കളക്ടീവ് എന്ന സംഘടന. ഒരു വിഭാഗം അഭിഭാഷകരുടെ സംഘടനയാണെന്ന് വെബ്സൈറ്റില് പറയുന്നു. പാര്ശ്വവത്കരിക്കപ്പെട്ടവര്ക്ക് നിയമത്തിന്റെ ഫലപ്രദമായ ഇടപെടലിലൂടെ ശാക്തീകരണവും മനുഷ്യാവകാശ വിഷയങ്ങളിലെ ഇടപെടലും നിയമസഹായവും വ്യവഹാരവുമാണ് ലക്ഷ്യമിടുന്നതെന്ന് വെബ്സൈറ്റില് പറയുന്നു.
