കൊച്ചി : ഫ്ളക്സ് ബോര്ഡ് നിരോധനം നടപ്പാക്കാത്തതില് സംസ്ഥാന സര്ക്കാരിന് താക്കീതുമായി ഹൈക്കോടതി. പ്രകൃതിയെ ചൂഷണം ചെയ്യുന്നതിന് ഒരു പരിധിയുണ്ടെന്നും ഫ്ളക്സ് നിരോധനം നടപ്പാക്കാന് സര്ക്കാരിന് നിശ്ചയദാര്ഢ്യം വേണമെന്നും കോടതി താക്കീതു ചെയ്തു.
ഇങ്ങനെ പോയാല് ചീഫ് സെക്രട്ടറിയെ വിളിച്ചു വരുത്തേണ്ടി വരും. ഫ്ളക്സ് ബോര്ഡുകള് നിരോധിക്കാന് ഉത്തരവിട്ടിട്ടും അത് നടപ്പാക്കാന് സര്ക്കാരിന് കഴിയാത്തത് എന്തുകൊണ്ടാണെന്നും കോടതി ചോദിച്ചു. മറുപടി നല്കാന് കൂടുതല് സമയം വേണമെന്ന് സര്ക്കാര് ആവശ്യപ്പെട്ടപ്പോള് എന്തിനാണ് ഇനിയും മറുപടി എന്നായിരുന്നു കോടതിയുടെ പ്രതികരണം.
അനധികൃത ഫ്ളക്സ് സ്ഥാപിച്ചാല് ഫൈന് ഈടാക്കാന് സര്ക്കാരിന് കോടതി കര്ശന നിര്ദ്ദേശം നല്കി. പ്രിന്സിപ്പല് സെക്രട്ടറി, തദ്ദേശസ്വയംഭരണ സ്ഥാപനങ്ങള് എന്നിവര് നടപടി സ്വീകരിക്കണം. ഫ്ലെക്സ് സ്ഥാപിക്കുന്നവരില് നിന്ന് 5000 രൂപ മുതല് 10000 രൂപ വരെ സര്ക്കാരിന് ഫൈന് ഈടാക്കാം. ഫൈന് അടച്ചില്ലെങ്കില് സ്വത്ത് കണ്ടുകെട്ടണം. ഫ്ലെക്സ് സ്ഥാപിച്ച കമ്പനികളുടെ ലൈസന്സ് പുതുക്കി നല്കരുത്. എന്ത് നടപടികള് സ്വീകരിച്ചു എന്ന് ഇനി കേസ് പരിഗണിക്കുമ്പോള് സര്ക്കാര് അറിയിക്കണമെന്നും കോടതി പറഞ്ഞു. ഈ മാസം 30ന് കേസ് വീണ്ടും പരിഗണിക്കും.
നിരോധന ഉത്തരവ് ഉണ്ടായിട്ടും ഫ്ളക്സ് ബോര്ഡുകള് സ്ഥാപിക്കുന്നത് നിയമ വ്യവസ്ഥകളോടുള്ള വെല്ലുവിളിയാണ്. ആളുകള്ക്ക് എന്തും ചെയ്യാം. കോടതി ചെയ്യുന്നത് തെറ്റാണ് എന്ന് പറയാന് കഴിയുമോ. അങ്ങനെയെങ്കില് ഈ കേസില് ഇടപെടാതിരിക്കാന് എന്നും ഹൈക്കോടതി പറഞ്ഞു.
