ന്യൂഡല്ഹി: മുസ്ലീം ഐഡന്റിറ്റിയുടെ പേരില് തനിക്ക് വിവേചനവും മാനസിക പീഡനവും നേരിടേണ്ടി വരുന്നുവെന്ന പരാതിയുമായി ജെ.എന്.യുവിലെ പ്രഫസര്. അസിസ്റ്റന്റ് പ്രഫസര് റോസിനി നസീറാണ് ഡല്ഹി ന്യൂനപക്ഷ കമ്മീഷനു ഇതുസംബന്ധിച്ച് പരാതി നല്കിയത്. വൈസ് ചാന്സിലര് മാമിഡല ജഗദീഷ് കുമാറും, സി.എസി.ഇ.ഐ.പി ചെയര്പേഴ്സണല് യഗതി ചിന്ന റാവുവും തന്നെ വേട്ടയാടുകയും പീഡിപ്പിക്കുകയും ചൂഷണം ചെയ്യുകയും വിവേചനം കാണിക്കുയും ചെയ്യുന്നുവെന്നാണ് റോസിനിയുടെ പരാതി. സെന്റര് ഫോര് ദ സ്റ്റഡി ഓഫ് സോഷ്യല് എക്സ്ക്ലൂഷന് ആന്റ് ഇന്ക്ലൂസീവ് പോളിസിയിലെ (സി.എസ്.എസ്.ഇ.ഐ.പി) അസിസ്റ്റന്റ് പ്രഫസറാണ് റോസിന.
ഈ രണ്ട് 'ശക്തരായ' പുരുഷന്മാരും ജോലി ഉപേക്ഷിക്കാന് നിര്ബന്ധിക്കുകയാണെന്നും തന്റേയും കുട്ടികളുടേയും സുരക്ഷിതത്വം ഓര്ത്ത് പേടിയുണ്ടെന്നും ന്യൂനപക്ഷ കമ്മീഷന് അയച്ച കത്തില് അവര് പറയുന്നു. റോസിനയുടെ പരാതിയുടെ അടിസ്ഥാനത്തില് ജെ.എന്.യു രജിസ്ട്രാറിന് ന്യൂനപക്ഷ കമ്മീഷന് നോട്ടീസ് അയച്ചിട്ടുണ്ട്.
'സി.എസ്.എസ്.ഇ.ഐ.പിയിലെ ഫാക്വല്ട്ടി സ്ഥാനത്തു നിന്നും ഞാന് രാജിവെച്ചില്ലെങ്കില് നജീബിനെ പോലെ എന്നേയും അപ്രത്യക്ഷയാക്കുമെന്നാണ് തോന്നുന്നത്.' റോസീന കത്തില് പറയുന്നു. ഭര്ത്താവും മൂന്നു വയസുള്ള മകനുമൊപ്പം ജെ.എന്.യു ക്യാംപസില് തന്നെയാണ് റോസിന ജീവിക്കുന്നത്.
2013ല് ജെ.എന്.യുവില് ചേരുന്നതിനു മുന്പ് ഇവര് നാലു വര്ഷത്തോളം ഹൈദരാബാദ് സെന്ട്രല് യൂണിവേഴ്സിറ്റിയില് സ്ഥിരം ഫാക്വല്റ്റിയായി ജോലി ചെയ്തിരുന്നു. ആറുവര്ഷത്തിലേറെയായി താന് ജെ.എന്.യുവില് ജോലി ചെയ്യുന്നുവെന്നും എന്നാല് 2017 മാര്ച്ച് മുതലാണ് തനിക്കുനേരെ മാനസിക പീഡനം തുടങ്ങിയതെന്നും ഇവര് പറയുന്നു.
