മലപ്പുറം: അപകടത്തെക്കുറിച്ച് മുന്നറിയിപ്പുമായി എത്തി ദുരന്തത്തില് പെട്ട അനീഷിന്റെ മൃതദേഹം കൂടി കണ്ടെത്തിയതോടെ കവളപ്പാറയില് മരണസംഖ്യ 48 ആയി ഉയര്ന്നു. ഇന്നലെ രണ്ടു പേരുടെ മൃതദേഹമാണ് കണ്ടെത്തിയത്. ഇനിയും 11 പേരെ കൂടി കണ്ടെത്താനുണ്ട്. ആദ്യ ഘട്ട തെരച്ചില് പൂര്ത്തിയാക്കിയതിന് പിന്നാലെ രണ്ടാം ഘട്ട തെരച്ചില് കവളപ്പാറയില് ഇന്ന് തുടങ്ങും.
മങ്ങാട്ടുപറമ്പില് അനീഷ് (37), കവളപ്പാറ കോളനിയിലെ ഉടുക്ക് പാലന് (48) എന്നിവരുടെ മൃതദേഹമാണു ഇന്നലെ കണ്ടെത്തിയത്. സംഭവ സമയത്ത് അപകടമുന്നറിയിപ്പ് നല്കാന് കവളപ്പാറയിലെത്തിയപ്പോഴാണ് അനീഷ് അപകടത്തില്പ്പെട്ടത്. ഉരുള്പൊട്ടല് ബാധിക്കാത്ത കവളപ്പാറ വായനശാലയ്ക്ക് സമീപത്തായിരുന്നു അനീഷിന്റെ വീട്. എന്നാല് അപകടദിവസം വൈകിട്ട് കവളപ്പാറ തോട് കരകവിഞ്ഞൊഴുകിയതിനെ തുടര്ന്നാണ് അപകട മുന്നറിയിപ്പു നല്കാനായി അനീഷ് ദുരന്തമേഖലയില് എത്തിയത്.
പ്രദേശത്തെ വെള്ളക്കെട്ടുകള് മോട്ടര് ഉപയോഗിച്ചു നീക്കം ചെയ്തശേഷമാണു തിരച്ചില് പുനരാരംഭിക്കുക. അപകടത്തില് പെട്ട എല്ലാവരെയും കണ്ടെത്തുന്നതുവരെ തിരച്ചില് തുടരുമെന്നു ജില്ലാ കളക്ടര് അറിയിച്ചിട്ടുണ്ട്. വയനാട് പുത്തുമലയിലെ തിരച്ചില് ദുരന്തസ്ഥലത്തു നിന്ന് 6 കിലോമീറ്റര് അകലെ സൂചിപ്പാറയിലേക്കു വ്യാപിപ്പിച്ചെങ്കിലും കൂടുതല് മൃതദേഹങ്ങള് കണ്ടെത്താനായിട്ടില്ല. ഇന്ന് സൂചിപ്പാറ വെള്ളച്ചാട്ടത്തോടു ചേര്ന്നു പരിശോധന തുടരുമെന്നാണ് വിവരം. ഗ്രൗണ്ട് പെനിട്രേഷന് റഡാര് (ജിപിആര്) സംവിധാനം ഉപയോഗിച്ചിട്ടും ഫലം കണ്ടില്ല.
