ന്യൂഡല്ഹി: ഭൂരിപക്ഷം കശ്മീരികളും ആര്ട്ടിക്കിള് 370 റദ്ദാക്കിയ നടപടിയെ പിന്തുണയ്ക്കുന്നുവെന്ന് ദേശീയ സുരക്ഷാ ഉപദേഷ്ടാവ് അജിത് ഡോവല്. തീവ്രവാദികളെ ഉപയോഗിച്ച് കശ്മീരില് സംഘര്ഷം സൃഷ്ടിക്കുന്നതില് നിന്ന് പാക്കിസ്ഥാനെ തടയുന്നതിനാണ് ചില നിയന്ത്രണങ്ങള് ഏര്പ്പെടുത്തിയിരിക്കുന്നതെന്നും അജിത് ഡോവല് പറഞ്ഞു. കശ്മീര് വിഷയത്തില് മാധ്യമപ്രവര്ത്തകരോട് സംസാരിക്കുകയായിരുന്നു അജിത് ഡോവല്.
ആര്ട്ടിക്കിള് 370 പ്രത്യേക പദവി ആയിരുന്നില്ല. അത് പ്രത്യേക വിവേചനമായിരുന്നുവെന്നും ഡോവല് പറഞ്ഞു. ആര്ട്ടിക്കിള് 370 റദ്ദാക്കിയതോടെ കശ്മീരികളും മുഴുവന് ഇന്ത്യയുടെ ഭാഗമായെന്നും ഡോവല് കൂട്ടിച്ചേര്ത്തു. ചില നിയന്ത്രണങ്ങള് ഭാഗികമായി നീക്കം ചെയ്തുകഴിഞ്ഞു. 199 പോലീസ് ജില്ലകളില് 10 ജില്ലകളില് മാത്രമാണ് നിലവില് നിരോധനാജ്ഞ നിലവിലുള്ളത്. എല്ലാ മേഖലകളിലും ലാന്ഡ് ലൈന് ബന്ധം പുനഃസ്ഥാപിച്ചുകഴിഞ്ഞുവെന്നും ഡോവല് കൂട്ടിച്ചേര്ത്തു.
കശ്മീരിലെ രാഷ്ട്രീയ നേതാക്കളെ കരുതല് തടങ്കലിലാക്കിയിരിക്കുന്നത് പ്രതിരോധ നടപടിയുടെ ഭാഗമായാണെന്ന് ഡോവല് പറഞ്ഞു. നിയമപ്രകാരമാണ് കരുതല് തടങ്കല്. കരുതല് തടങ്കലിലാക്കിയ നേതാക്കളെക്കുറിച്ച് കോടതികളോട് ഉത്തരം പറയാന് സര്ക്കാര് ബാധ്യസ്ഥമാണ്. നിയമം മറികടന്ന് എന്തെങ്കിലും ചെയ്താല് സര്ക്കാര് മറുപടി പറയേണ്ടി വരുമെന്നും ഡോവല് കൂട്ടിച്ചേര്ത്തു.
ആര്ട്ടിക്കിള് 370 റദ്ദാക്കിയ സര്ക്കാര് നടപടിയെ ഭൂരിപക്ഷം കശ്മീരികളും പിന്തുണയ്ക്കുന്നു. ചെറുന്യുനപക്ഷം മാത്രമാണ് നടപടിയെ എതിര്ക്കുന്നത്. കശ്മീരിലെ സമാധാനാന്തരീക്ഷം നശിപ്പിക്കാനാണ് പാക്കിസ്ഥാന് ശ്രമിക്കുന്നത്. അതിനായി അവര് തീവ്രവാദികളെ കശ്മീരിലേക്ക് ഇറക്കിയിട്ടുണ്ടെന്നും ഡോവല് പറഞ്ഞു. കശ്മീരില് മനുഷ്യാവകാശ ലംഘനങ്ങള് നടക്കുന്നുവെന്ന ആരോപണം തെറ്റാണെന്ന് ഡോവല് പറഞ്ഞു. കശ്മീര് ജനതയ്ക്ക് സംരക്ഷണം ഒരുക്കുന്നതിന് വേണ്ടിയാണ് സൈന്യത്തെയും അര്ദ്ധസൈനിക വിഭാഗത്തെയും വിന്യസിച്ചിരിക്കുന്നതെന്നും ഡോവല് കൂട്ടിച്ചേര്ത്തു.
