റോഡിലെ കുഴി നികത്താന് നേരിട്ട് ഇറങ്ങിയ ഐ.ജി. വിജയ് സാക്കറെയ്ക്കതിരെ ഇടഞ്ഞ പൊതുമരാമത്ത് വകുപ്പിനെ കണക്കറ്റ് പരിഹസിച്ച് മുന് ഡിജിപി ജേക്കബ് പുന്നൂസ്. കൊച്ചിയില് റോഡുകളില് കുഴി നികത്താന് നേരിട്ടിറങ്ങിയ ഐജിക്കെതിരെ പൊതുമരാമത്ത് വകുപ്പ്, മന്ത്രി ജി.സുധാകരന് രഹസ്യ റിപ്പോര്ട്ട് നല്കിയെന്ന വാര്ത്ത മംഗളമാണ് റിപ്പോര്ട്ട് ചെയ്തത്. പോലീസ് നിയമം ലംഘിച്ചെന്ന് ചൂണ്ടിക്കാട്ടിയാണ് പൊതുമരാമത്ത് വകുപ്പ് ദേശീയപാത വിഭാഗം എക്സിക്യൂട്ടീവ് എന്ജീനീയര് മന്ത്രിക്കു റിപ്പോര്ട്ട് കൈമാറിയത്. ഗതാഗതക്കുരുക്ക് ഉണ്ടാക്കിയെന്നും, പോലീസ് സര്ക്കാരിന് പേരുദോഷം വരുത്തിയെന്നും റിപ്പോര്ട്ടില് ആരോപിച്ചിരുന്നു.
മംഗളം നല്കിയ ഈ വാര്ത്ത പങ്കുവെച്ചുകൊണ്ടാണ് ജേക്കബ് പുന്നൂസ് ഫെയ്സ്ബുക്കിലുടെ പൊതുമരാമത്ത് വകുപ്പിന് കണക്കറ്റ് പരിഹാസം ചൊരിഞ്ഞിരിക്കുന്നത്. കാത്തുസൂക്ഷിച്ചൊരു മെറ്റല് കൂമ്പാരം കാക്കത്തൊള്ളായിരം പോലീസുകാരും അവരുടെ ഐജിയും കൂടി കോരിവാരി കൊത്തിക്കൊണ്ടുപോയി കുഴിമൂടിയാല് അതെങ്ങനെ സഹിക്കാന് സാധിക്കുമെന്ന് മുന് ഡിജിപി പരിഹസിക്കുന്നു. കരാറുകാരനും കൂലിക്കാരും കോരിയെടുത്ത് കുഴിമൂടിയാലല്ലേ ഞങ്ങള്ക്കത് ബില്ലെഴുതാന് പറ്റൂ.. ഇതൊക്കെ കേട്ടാല് കല്ലുപോലും കരഞ്ഞുപോകുമെന്നും പോസ്റ്റില് മുന് ഡിജിപി കുറിക്കുന്നു.
മുന് ഡിജിപി ജേക്കബ്ബ് പുന്നൂസിന്റെ ഫെയ്സ്ബുക്ക് പോസ്റ്റിന്റെ പൂര്ണരൂപം:
വഴിക്കുഴിക്കുമുണ്ടോ നോക്കുകൂലി????
"ഞങ്ങടെ വഴി, ഞങ്ങടെ കുഴി, നിങ്ങക്കെന്താ പോലീസേ?"
വഴിയിലെ കുഴിയിൽ വഴിയാത്രക്കാർ വീഴാതിരിക്കാൻ കുഴിയടച്ച പോലീസിനെ പഴിച്ചു പി ഡബ്ലിയു ഡി !
വാർത്ത തെറ്റാണെന്ന് വിശ്വസിക്കാൻ കാര്യമില്ല..
കാത്തു സൂക്ഷിച്ചൊരു മെറ്റൽ കൂമ്പാരം കാക്കത്തൊള്ളായിരം പോലീസുകാരും അവരുടെ ഐജിയും കൂടി കോരിവാരി കൊത്തിക്കൊണ്ടുപോയി കുഴിമൂടിയാൽ അതെങ്ങനെ സഹിക്കാൻ സാധിക്കും?
കരാറുകാരനും കൂലിക്കാരും കോരിയെടുത്തു കുഴിമൂടിയാലല്ലേ, ഞങ്ങൾക്കതു അളന്നുകുറിച്ചു
ബില്ലെഴുതാൻ പറ്റൂ.
ഞങ്ങൾ വാരി കുഴിയിലിടേണ്ട മെറ്റൽ നിങ്ങൾ വാരിയിട്ടാൽ ആ പണിക്കു ആരു ബില്ലെഴുതും? കഷ്ടം.. കഷ്ടം.. കലികാലം തന്നെ ! കുഴിയിലെ കല്ലുപോലും കരഞ്ഞുപോകും !!
ഈ വാർത്ത തെറ്റാണെന്നു വിശ്വസിക്കാനാണ് എനിക്കിഷ്ടം. യാത്രക്കാർ കുഴിയിൽ വീണു നടുവൊടിയുന്നതു തടയാനും ഗതാഗതം സാധ്യമാക്കാനും വേണ്ടി വഴിയിലിടാൻ കൊണ്ടു വെച്ച മെറ്റൽ വാരി കു ഴിയിലിട്ടു എന്നത് മാത്രമാണ് പോലീസ് ചെയ്തത്. ജനങ്ങളെ അപകടങ്ങളിൽനിന്നു രക്ഷിക്കാനും അതിനായി ന്യായമായ കാര്യങ്ങൾ ചെയ്യാനും പൊലീസിന് അധികാരം മാത്രമല്ല, അല്പമൊക്കെ ബാധ്യതയും ഉണ്ട്..
ഉദാഹരണത്തിന്
റോഡിൽ മരം വീണാൽ പോലീസുകാർ അത് വെട്ടിമാറ്റും. എണ്ണ വീണു പരന്നാൽ തുടച്ചു നീക്കിപ്പി ക്കാം. അതുപോലെ അപകടകരമായ രീതിയിൽ കുഴിയുണ്ടായാൽ അത് കഴിയുമെങ്കിൽ മൂടണം. അല്ലെങ്കിൽ മൂടിക്കണം..
യഥാർത്ഥത്തിൽ പോലീസിനെ ഇക്കാര്യത്തിൽ ചട്ടം ചൂണ്ടിക്കാട്ടി വിരട്ടുന്നതു മലർന്നു കിടന്നു തുപ്പുന്നതു പോലെയാണ്. മെറ്റൽ അവിടെയുണ്ടായിരുന്നെങ്കിൽ എന്തുകൊണ്ട് പി ഡബ്ലിയു ഡി നേരത്തെ തന്നെ കുഴി മൂടിയില്ല?
വഴി അപകടസാധ്യതയില്ലാതെ സംരക്ഷിക്കേണ്ടതു റോഡുപണിയാൻ ബാധ്യതയുള്ളവരാണ്. അത് കൊണ്ട് അവർ കുഴിയടക്കാതെ ആരെങ്കിലും കുഴിയിൽ വീണു അപകടപ്പെട്ടാൽ, കുഴിയടയ്ക്കാത്തവരെ കൂടി പ്രതിയാക്കി കേസെടുക്കേണ്ടതാണ്.
നല്ല ബന്ധങ്ങൾ പാലിക്കേണ്ടതു കൊണ്ടു
ആ രീതി കേരളത്തിൽ ഇതുവരെയില്ല.
അങ്ങനെ ചെയ്യാത്തത് കൊണ്ടാണ്.... ഞങ്ങടെ വഴി, ഞങ്ങടെ കുഴി. നിങ്ങക്കെന്താ പോലീസേ... എന്ന് ചോദിക്കാൻ ആൾക്കാർ ഉണ്ടാവുന്നത് !!
കുഴി എണ്ണിയതും പോരാ,
കുഴി അടച്ചതും പോരാ,
എന്നിട്ടും പഴി പോലീസിന് !
മെറ്റൽ പൊലീസ് തട്ടിമാറ്റി എന്നാരോ കണ്ടു പിടിച്ചു പരാതി നൽകുന്നു !!
ആരാണോ കുഴികളുടെയും
കുഴിമാടങ്ങളുടെയും
കാവൽക്കാർ?
വഴിയിലെ കുഴിക്കുമുണ്ടോ നോക്കുകൂലി?
