ന്യൂഡല്ഹി: പ്രധാനമന്ത്രി നരേന്ദ്രമോഡിയെ ' ഇന്ത്യയുടെ പിതാവായി' അംഗീകരിക്കാന് സാധിക്കാത്തവരെ ഇന്ത്യക്കാരായി കണാനാവില്ലെന്ന് കേന്ദ്ര മന്ത്രി ജിതേന്ദ്ര സിങ്. മോഡിയെ ഇന്ത്യയുടെ പിതാവെന്ന് വിശേഷിപ്പിക്കാന് ആഗ്രഹിക്കുന്നുവെന്ന് കഴിഞ്ഞ ദിവസം യു.എസ് പ്രസിഡന്റ് ഡൊണാള്ഡ് ട്രംപ് പറഞ്ഞിരുന്നു. ഇതുമായി ബന്ധപ്പെട്ട് ഉയര്ന്ന വിവാദങ്ങളോട് പ്രതികരിക്കുകയായിരുന്നു മന്ത്രി.
വിദേശത്ത് താമസിക്കുന്ന ആളുകള്ക്ക് ഇപ്പോള് ഇന്ത്യാരാണെന്ന് പറയുന്നതില് വലിയ അഭിമാനമാണുള്ളത്. പ്രധാനമന്ത്രി മോഡിയുടെ വ്യക്തിത്വവും വ്യക്തിപരമായ സമീപനവുമാണ് ഇതിന് കാരണം. ഒരു അമേരിക്കന് പ്രസിഡന്റ് ഇത്തരത്തിലുള്ള സ്തുതിവാക്കുകള് ഉപയോഗിക്കുന്നത് ഇതാദ്യമായാണ്.
അത് ഇന്ത്യന് പ്രധാനമന്ത്രിയെന്ന് നിലയ്ക്കല്ല. മറ്റൊരു ലോക നേതാവെന്ന നിലയിലാണ്. അതില് അഭിമാനിക്കുകയാണ് വേണ്ടത്. അങ്ങനെ ചെയ്യാത്തവര് സ്വയം ഇന്ത്യക്കാരായി അംഗീകരിക്കാത്തവരാണെന്നും അദ്ദേഹം പറഞ്ഞു.
