ന്യൂഡല്ഹി: കേന്ദ്ര റെയില്വേ മന്ത്രി പീയുഷ് ഗോയലിന്റെ വീട്ടില് മോഷണം. ഗോയലിന്റെ മുംബൈ നേപ്പീയര് സീ റോഡിലുള്ള വീട്ടിലാണ് മോഷണം നടന്നത്. സ്വകാര്യ കമ്പ്യൂട്ടറില് നിന്ന് സുപ്രധാന രഹസ്യ രേഖകള് ഉള്പ്പെടെ ചോര്ന്നതായി പോലീസ് സംശയിക്കുന്നുണ്ട്. സംഭവത്തില് ഗോയലിന്റെ വീട്ടുജോലിക്കാരനെ മുംബൈ പോലീസ് അറസ്റ്റ് ചെയ്തു.
സംഭവത്തില് 28 കാരനായ വിഷ്ണുകുമാര് വിശ്വകര്മ്മ എന്നയാളാണ് പിടിയിലായിരിക്കുന്നത്. സെപ്റ്റംബര് 16നും 18 നും ഇടയിലാണ് മോഷണം നടന്നത്. വീട്ടില് നിന്ന് വെള്ളിപ്പാത്രങ്ങളും അപൂര്വ പിച്ചള പാത്രങ്ങളും മോഷണം പോയതായി കാണിച്ച് ഗോയലിന്റെ കുടുംബാംഗങ്ങള് പോലീസില് പരാതി നല്കിയതോടെയാണ് സംഭവം പുറത്തായത്. മോഷ്ടിച്ച വസ്തുക്കള് ഇയാളില് നിന്ന് കണ്ടെടുത്തിട്ടുണ്ട്.
വിഷ്ണു കുമാറിന്റെ ഫോണ് പരിശോധിച്ചതില് നിന്നാണ് കമ്പ്യൂട്ടറില് നിന്ന് ഉഇയാള് രഹസയ വിവരങ്ങളും ചോര്ത്തിയെന്ന സംശയം പോലീസിന് ബലപ്പെട്ടത്. അജ്ഞാത വ്യക്തികള്ക്ക് ഇയാളുടെ ഫോണില് നിന്ന് മെയിലുകള് അയച്ചതായി കണ്ടെത്തിയിട്ടുണ്ട്. ചില മെയിലുകളും രേഖകളും ഫോണില് നിന്ന് ഡിലീറ്റ് ചെയ്യപ്പെട്ട നിലയിലാണ്. ഇയാളുടെ ഫോണ് പോലീസ് സൈബര് സെല്ലിന് കൈമാറിയിട്ടുണ്ട്. മൂന്ന് വര്ഷമായി ഇയാള് ഗോയലിന്റെ വീട്ടില് ജോലിക്കായി എത്തിയിട്ട്.
