മലയാള സിനിമയിലെ ഹാസ്യ താരം സലിം കുമാറിന്റെ 50-ാം പിറന്നാള് ആഘോഷവേളയില് താരത്തെ ട്രോളിയും തമാശ പറഞ്ഞും അതിഥികളെ കയ്യിലെടുത്ത് മെഗാസ്റ്റാര് മമ്മൂട്ടിയും ജനപ്രിയ താരം ദിലീപും ഭാര്യ കാവ്യയും. മമ്മൂട്ടിയാണ് സലിംകുമാറിനെ ആദ്യം ട്രോളിയതെങ്കിലും പിന്നിലെ ദിലീപും കാവ്യയും ആ ട്രാക്ക് പിന്തുടര്ന്ന് വേദിയില് ചിരി പടര്ത്തി. ഇതൊക്കെ ആസ്വദിച്ച് മറുപടിയും പറഞ്ഞ് ചടങ്ങില് വിലസി സലിംകുമാറും.
സലിം കുമാറിനെ ട്രോളിയായിരുന്നു മെഗാസ്റ്റാര് മമ്മൂട്ടി പ്രസംഗം ആരംഭിച്ചത്. 'വലിയ നടന്മാരെയൊന്നും കിട്ടാത്തതുകൊണ്ടായിരിക്കും എന്നെ വിളിച്ചത്. സലിം എനിക്കു കുറച്ചു പൈസ തന്നതുകൊണ്ടാണ് ഞാന് ഇവിടെ വന്നത്. അദ്ദേഹത്തെപറ്റി നല്ലകാര്യങ്ങള് പറയണം. കുറേ പൊക്കിയടിക്കണം എന്നൊക്കെയാണ് എന്നോട് പറഞ്ഞത്. വളരെ നല്ല സുമുഖനും സുന്ദരനുമാണ് സലിം കുമാര്. പുക വലിക്കില്ല, മദ്യപിക്കില്ല, സിനിമ കാണില്ല അങ്ങനെ ഒരു ചീത്ത സ്വഭാവവും ഇല്ല. നാട്ടുകാര്ക്ക് ഒരുപാട് ഗുണം ചെയ്യും. കിട്ടുന്ന കാശ് മുഴുവന് നാട്ടുകാര്ക്ക് കൊടുക്കും. ഇങ്ങനെയുളള ആളാണ് സലിംകുമാര്' -മമ്മൂട്ടി പറഞ്ഞു.
'ഹാസ്യ അഭിനയത്തില് പുതിയ ഒരു അധ്യായം തുറന്ന് നടനാണ് സലിം കുമാര്. അത് മാത്രമല്ല ജീവിതത്തിലായാലും സിനിമയിലായാലും നിലപാടുളള വ്യക്തിത്വമാണ് അദ്ദേഹത്തിന്റേത്'.
'സലിമിന്റെ യഥാര്ഥ പ്രായം നാട്ടുകാരെ അറിയിക്കാനാണ് ഈ പരിപാടി. പത്രത്തിലൊക്കെ പരസ്യം കൊടുത്തിരുന്നു. ഒരുപാട് അടുപ്പമുണ്ട് അദ്ദേഹവുമായി. ഈ പരിപാടിയില് എന്നെ വിളിക്കാന് തോന്നിയതും ഇതില് പങ്കെടുക്കാന് കഴിഞ്ഞതും ഭാഗ്യമായി കരുത്തുന്നു'.
ദിലിപ് : കോളജില് എന്റെ ജൂനിയറായി പഠിച്ച ആളാണ് സലിം കുമാര്. കുടുംബാംഗങ്ങള് മാത്രമേ ഉണ്ടാകു എന്നാണ് എന്നോട് പറഞ്ഞത്. ഇവിടെ വന്നപ്പോഴാണ് ഇത്ര വലിയ പരിപാടിയാണെന്ന് മനസിലായത്. സലിമിന് 50 വയസ്സു തികയുന്നു. ഇനി അടുത്തത് 100 നമമള് ആഘോഷിക്കും.
സലിം കുമാറിന്റെ സൗഹ്യദത്തെക്കുറിച്ച് പറയുമ്പോള് ഒരു സംഭവമാണ് ഓര്മ വരുന്നത്. മിമിക്രി വിട്ട് സിനിമ തന്നെയാണ് ഞങ്ങളുടെ ലക്ഷ്യമെന്ന് ഞാനും നാദിര്ഷയും തീരുമാനിച്ച സമയം. അന്നാണ് അക്കു അക്ബര് ഒരു പരിപാടിക്ക് വിളിക്കുന്നത്. അതിഥികളായാണ് ഞങ്ങളെ ക്ഷണിക്കുന്നത്. സലിം ഇക്ക ഉള്പ്പെട്ട ട്രൂപ്പിന്റെ മിമിക്സ് പരേഡ് ആണ് അവിടെ നടക്കുന്നത്. സലിം വന്നിട്ടുണ്ട്. എന്നാല് സലിമുമായി ഒന്നിച്ച് സിനിമ ചെയ്തിട്ടില്ല. അദ്ദേഹത്തിന്റെ പ്രോഗ്രാം കണ്ടിട്ടുണ്ട്.
ഞങ്ങള് അവിടെ അതിഥികളായി വന്നിരിക്കുകയാണ്. ഒരുപാട് പേര് വന്നിട്ടുണ്ട്. കുറച്ച് കഴിഞ്ഞപ്പോള് അവിടെ ആകെ പ്രശ്നം. സലിമിന്റെ കൂട്ടത്തിലുളള സുഹൃത്തുകള് പരിപാടിക്ക് എത്തിയിട്ടില്ല. രംഗം കുഴപ്പമായി തുടങ്ങി. സലിം ആകെ ടെന്ഷന് അടിച്ച് നില്ക്കുകയാണ്. അങ്ങനെ ഞാനും നാദിര്ഷയൂം പതുക്കെ പോകാന് ഇറങ്ങിയപ്പോള് ഒരുകൂട്ടം. അക്കുവിനെ കുറച്ച് പേര് പിടിച്ച് നിര്ത്തിയിരിക്കുകയാണ്. പെട്ടന്നാണ് എന്നെ തെറി പറഞ്ഞ് പൊലീസുകാര് മുന്നോട്ടുവന്നത്. 'സ്റ്റേജില് കയറടാ' എന്നു പറഞ്ഞു.
നിറകണ്ണുകളോടെയാണ് ഞാന് സ്റ്റേജില് കയറുന്നത്. സ്റ്റേജിന്റെ പിന്നില് നിന്ന് വെറും 5 മിനിറുകൊണ്ട് രണ്ടര മണിക്കൂര് കളിക്കേണ്ട പ്രോഗ്രാം റിഹേര്സല് നടത്തി. അന്നാണ് ഞാനും സലിമും ആദ്യമായി വേദി പങ്കിടുന്നത്. അത് ഗംഭീര വിജയമായി മാറി. മിമിക്രിയില് എന്റെ അവസാന സ്റ്റേജ് ആയിരുന്നു അത്.
കുടുബത്തിലെ അംഗത്തെപ്പോലെയാണ് സലിം. ദേശീയ അവാര്ഡ് വരെ നേടിയ അദ്ദേഹത്തിന് എല്ലാ ആശംസകളും.
സലിം കുമാര് : 'അമേരിക്കയില് വച്ചാണ് ഞാനും മമ്മൂക്കയും തമ്മിലുളള ബന്ധം തുടങ്ങുന്നത്. 2000 ത്തിലാണത്. അന്ന് മമ്മൂക്കയെ പരിചയമില്ല. സുകുമാരി ചേച്ചി, വിനീത് ഇവരൊക്കെ കൂടെയുണ്ട്. പക്ഷേ പരിചയമില്ല. എന്റെ കല്യാണം കഴിഞ്ഞ സമയമാണ്. വല്ലാത്തൊര അവസ്ഥ. പൈസ കിട്ടുന്നകൊണ്ടു മാത്രമാണ് ഞാന് ആ പരിപാടിക്ക് പോയത്'.
'ഈ പരിപാടി പൊളിയുമെന്ന് മമ്മൂക്കയ്ക്ക് ഉറപ്പായിരുന്നു. പ്രധാന കാരണം ആളുകളൊന്നുമില്ല. പക്ഷേ ആ പരിപാടി വലിയ വിജയമായി. കാരണം അന്ന് ആ പരിപാടിയിലെ പ്രധാന കോമഡിതാരം ഞാന് ആയിരുന്നു. അന്നുതൊട്ടാണ് അദ്ദേഹവുമായുളള ബന്ധം തുടങ്ങുന്നത്. എന്റെ ഓരോ നീക്കത്തിലും മമ്മൂട്ടിയുടെ അനുഗ്രഹത്തോടെയാണ് ഞാന് മുന്നോട്ടുപോയിട്ടുളളത്'.
'എന്റെ സുഹൃത്തുക്കള്, കോളജിലെ സുഹൃത്തുക്കള് ഒക്കെ ഇവിടെയുണ്ട്. ഈ വണ്ടി ഇവിടെ എത്തുമെന്ന് ഒരിക്കലും പ്രതീക്ഷിച്ചിരുന്നില്ല. 2000-ലാണ് ഞാന് ആദ്യമായി മരിക്കുന്നത്. കാറപകടത്തില് മരിച്ചു എന്നായിരുന്നു വാര്ത്ത. അങ്ങനെ പെട്ടന്ന് പല തവണ മരണപ്പെട്ടു. അങ്ങനെ പെട്ടന്ന് ചാകുന്ന ഇനമല്ല ഞാന്. എന്റെ കൈയ്യിലിരുപ്പ് വച്ച് പണ്ടേ പോകണ്ട സമയം കഴിഞ്ഞു. 36 ാം വയസ്സില് തീരുമെന്നായിരുന്നു ഞാന് ഓര്ത്തിരുന്നത്. എന്റെ സഹോദരന് ഒരാളുണ്ടായിരുന്നു. ധര്മന് എന്നായിരുന്നു പേര്. സിഗരറ്റ് വലിക്കില്ല, കളള് കുടിക്കില്ല. ആ മനുഷ്യന് കുടിയന്മാര്ക്കു വരുന്ന അസുഖം വന്ന് മരിച്ചുപോയി.
അതുകൊണ്ട് എന്റെ ജീവിതം വലിയ ബോണസ്സാണ്. ഒരുപാട് കൊല്ലം ഈ മണ്ണില് ജീവിക്കണം. എന്റെ നൂറ് വയസ്സ് ആഘോഷിക്കുമ്പോള് ഇപ്പോള് വന്നവരൊക്കെ അന്നും വന്ന് ഇങ്ങനെയിരിക്കണമെന്നും ആഗ്രഹമുണ്ട്.
കാവ്യമാധവന് : സലിമേട്ടനുമായി ഒരുപാട് രസകരമായ നിമിഷങ്ങള് ജീവിതത്തിലുണ്ടായിട്ടുണ്ട്. ഒരുപക്ഷേ എന്നെപ്പോലെ ആ അനുഭവങ്ങളുളള മറ്റൊരാള് പോലും ഉണ്ടാകില്ല. അത്രത്തോളം ഈ മനുഷ്യന് പറഞ്ഞു പറ്റിച്ചിട്ടുണ്ട്. തെങ്കാശിപ്പട്ടണം മുതലുളള കഥ പറയാനുണ്ട്. ഇടയ്ക്ക് അദ്ദേഹം എന്റെ അമ്മാവനാകും, ചിലപ്പോള് കാമുകനാകും അങ്ങനെ ഒരുപാട് കഥകള്.
ഞങ്ങള് തമ്മില് വഴക്ക് ഉണ്ടാകാറുണ്ട്. സിനിമാപരമായ ബന്ധമല്ല. സലിമേട്ടന്റെ കുടുബമായിട്ടുളളത്. ഒരുപാട് വര്ഷം ആരോഗ്യത്തേടെ ഇരിക്കാന് ഈശ്വരന് അനുഗ്രഹിക്കട്ടെ.
