ഇസൂസുവിന്റെ ഡി-മാക്സ് പിക്കപ്പ് ട്രക്കിന്റെ അവതരണം തായ്ലാന്ഡില് നടന്നു. രൂപത്തിലും മറ്റും രണ്ടാംതലമുറ ഡി-മാക്സില് നിന്നും ചെറിയ ചില മാറ്റങ്ങളോടെയാണ് പുതിയ ഡി-മാക്സ് പിക്കപ്പ് ട്രക്ക് എത്തിയിരിക്കുന്നത്. റഗുലര് കാബ്, സ്പേസ് കാബ്, ക്ര്യൂ കാബ് എന്നീ വേരിയന്റുകളാണ് പുതിയ ഡി-മാക്സിനുള്ളത്.
ഇന്ത്യയിലുള്ള ഡി-മാക്സിനെക്കാള് അല്പം ചെറുതാണെങ്കിലും വീല്ബേസ് വര്ധിച്ചിട്ടുണ്ട്. നിലവില് 1.9 ലിറ്റര് ഡി-മാക്സാണ് ഇന്ത്യയിലുള്ളത്. 150 എച്ച്പി പവറും 350 എന്എം ടോര്ക്കുമേകുന്ന 1.9 ലിറ്റര് ഡീസല് എന്ജിനും 190 എച്ച്പി പവറും 450 എന്എം ടോര്ക്കും നല്കുന്ന 3.0 ലിറ്റര് ഡീസല് എന്ജിനുമാണ് ഡി-മാക്സിന് കരുത്തേകുന്നത്.
6 സ്പീഡ് മാനുവല്, 6 സ്പീഡ് ഓട്ടോമാറ്റിക്കാണ് ട്രാന്സ്മിഷന് ഓപ്ഷന്. 5265 എംഎം നീളവും 1870 എംഎം വീതിയും 1790 എംഎം ഉയരവും 3125 എംഎം വീല്ബേസുമാണ് വാഹനത്തിനുള്ളത്.
വലിയ ഗ്രില്, ബൈ-എല്ഇഡി ഹെഡ്ലൈറ്റ്, വ്യത്യസ്തമായ ഇന്റഗ്രേറ്റഡ് ഡേ ടൈം റണ്ണിങ് ലൈറ്റ്, എല്ഇഡി ടെയില് ലൈറ്റ്, 18 ഇഞ്ച് മള്ട്ടി സ്പോക്ക് അലോയി വീല്, ബ്രൗണ് ആന്ഡ് ബ്ലാക്ക് ഡ്യുവല് ടോണ് ഇന്റീരിയര്, ത്രീ സ്പോക്ക് മള്ട്ടി ഫങ്ഷന് സ്റ്റിയറിങ് വീല്, ട്വിന് പോഡ് ഇന്സ്ട്രുമെന്റ് ക്ലസ്റ്റര്, ആന്ഡ്രോയ്ഡ് ഓട്ടോ-ആപ്പിള് കാര് പ്ലേ കണക്റ്റിവിറ്റിയുള്ള 9 ഇഞ്ച് ടച്ച് സ്ക്രീന് സിസ്റ്റം, എട്ട് തരത്തില് അഡ്ജസ്റ്റ് ചെയ്യാവുന്ന ഡ്രൈവര് സീറ്റ് എന്നിവയാണ് പുതുതലമുറ ഡി-മാക്സിന്റെ പ്രധാന സവിശേഷതകള്.
