ജർമ്മൻ വാഹന നിർമ്മാതാക്കളായ ഔഡി തങ്ങളുടെ ആഢംബര സെഡാനായ A6-ന്റെ പരിഷ്ക്കരിച്ച പതിപ്പ് വിപണിയിൽ അവതരിപ്പിച്ചു. 2019 ഔഡി A6-ന്റെ ഇന്ത്യയിലെ എക്സ്ഷോറൂം വില 54.20 ലക്ഷം രൂപയാണ്. പുതിയ 2019 മോഡലിന് പൂർണ്ണമായും പരിഷ്ക്കരിച്ച സ്റ്റൈലിംഗും വാഹനത്തിന്റെ അകത്തളത്ത് നിരവധി മാറ്റങ്ങളും ഉണ്ട്.
2019 ഔഡി A6 നിലവിലുള്ള മോഡലിനേക്കാൾ കൂടുതൽ മൂർച്ചയുള്ളതും സ്പോർട്ടിയുമാണ്. ഇരുവശത്തും പുതുക്കിയ എൽഇഡി ഹെഡ്ലാമ്പുകളും ഒരു പുതിയ ബോണറ്റും വാഹനത്തിന് ഒരു മസ്ക്കുലർ ലുക്ക് നൽകും. ഇതിൽ പുതിയ ഗ്രിൽ ഉൾപ്പെടുന്നു. A6 സെഡാന്റെ പിൻഭാഗത്ത് എൽഇഡി ടെയിൽ ലാമ്പുകൾ സിംഗിൾ ക്രോം സ്ട്രിപ്പ് ഉപയോഗിച്ച് ബന്ധിപ്പിച്ചിരിക്കുന്നു. പരിഷ്ക്കരിച്ച വാഹനത്തിന് ഡ്യുവൽ-ടോൺ അലോയ് വീലുകളും ഉൾപ്പെടുത്തിയിട്ടുണ്ട്. ഇത് ലോംഗ് വീൽബേസിനൊപ്പം പ്രീമിയം രൂപവും ഭാവവും നൽകുന്നു.
ഡ്യുവൽ ടച്ച്സ്ക്രീൻ ഇൻഫോടെയിൻമെന്റ് സ്ക്രീൻ, വിർച്വൽ കോക്ക്പിറ്റ് ഇൻസ്ട്രുമെന്റ് ക്ലസ്റ്റർ, ഫോർ സോൺ ക്ലൈമറ്റ് കൺട്രോൾ, ആംബിയന്റ് ലൈറ്റിംഗ് പാക്കേജ്, പുതിയ MMI ഇൻഫോടെയിൻമെന്റ് ഇന്റർഫേസ്, പനോരമിക് സൺറൂഫ് എന്നിവ അകത്തളത്ത് ഉൾപ്പെടുന്നു. പുതിയ 2019 ഔഡി A6 ഒരൊറ്റ പെട്രോൾ എഞ്ചിനിൽ മാത്രമാണ് വാഗ്ദാനം ചെയ്യുന്നത്.
2.0 ലിറ്റർ TFSI യൂണിറ്റ് 240 bhp കരുത്തും 370 Nm ടോർക്കും ഉത്പാദിപ്പിക്കുന്നു. എട്ട് എയർബാഗുകൾ, EBD-യോടുകൂടിയ എബിഎസ്, റിയർ പാർക്കിംഗ് സെൻസറുകൾ, 360 ഡിഗ്രി ക്യാമറ, ഓട്ടോ ഹോൾഡ് ഫംഗ്ഷൻ, ഇലക്ട്രോണിക്ക് സ്ഥിരത കൺട്രോൾ, ക്രൂയിസ് കൺട്രോൾ, ട്രാക്ഷൻ കൺട്രോൾ എന്നിവയും പുതിയ മോഡലിൽ ഉൾപ്പെടുത്തിയിട്ടുണ്ട്.
