തിരുവനന്തപുരം: യുഎപിഎ ചുമത്തിയത് പുനപരിശോധിക്കുന്നതിനെതിരെ രൂക്ഷ വിമര്ശനവുമായി കേന്ദ്ര സഹമന്ത്രി വി. മുരളീധരന്. പാര്ട്ടി നേതാക്കളുടെ വാക്കാണോ ഭരണഘടനയാണോ വലുതെന്ന് സംസ്ഥാന സര്ക്കാര് തീരുമാനിക്കണമെന്നും ഭരണാധികാരികള് പാര്ട്ടി നേതാക്കള് പറയുന്നതിനൊത്ത് തുള്ളുകയാണെങ്കില് ഭരണഘടനയല്ല പാര്ട്ടി നേതാക്കളാണ് വലുതെന്ന് ജനങ്ങളോട് പറയണമെന്നും മുരളീധരന് പറഞ്ഞു.
യുഎപിഎ ഇടതുസര്ക്കാര് സര്ക്കാര് നയമല്ലെന്ന് പറയുന്നവര്ക്ക് ഭരിക്കാന് അവകാശമില്ലെന്നും മുരളീധരന് വിമര്ശിച്ചു. കമ്മ്യൂണിസ്റ്റ് ഭീകരബന്ധം ആരോപിച്ച് കോഴിക്കോട് രണ്ട് യുവാക്കളെ അറസ്റ്റു ചെയ്ത സംഭവത്തിലാണ് കേന്ദ്രമന്ത്രി നിലപാട് വ്യക്തമാക്കിയത്. ഇടതു പാര്ട്ടി നേതാക്കളുടെ വാക്ക് കേട്ട് അരാജക വാദികളെ വളരാന് സര്ക്കാര് അനുവദിക്കരുതെന്നും അദ്ദേഹം ആവശ്യപ്പെട്ടു.
ഗാന്ധിജി സങ്കല്പ്പ യാത്രയുടെ ഭാഗമായി മാധ്യമപ്രവര്ത്തകരോട് സംസാരിക്കുകയായിരുന്നു വി.മുരളീധരന്. വര്ക്കലയില് നിന്നു കല്ലമ്പലത്തേയ്ക്കാണ് ഗാന്ധി സങ്കല്പ്പയാത്ര സംഘടിപ്പിച്ചത്. യാത്രയില് ബി.ജെ.പിയുടെ മുതിര്ന്ന നേതാക്കളും പങ്കെടുത്തു.
അതേസമയം യുഎപിഎ ചുമത്തി വിദ്യാര്ത്ഥികളെ അറസ്റ്റു ചെയ്ത സംഭവം പുനപരിശോധിക്കുമെന്ന് പ്രോസിക്യൂഷന് കോടതിയെ അറിയിച്ചു. രണ്ടു ദിവസത്തിനകം കോടതിയില് റിപ്പോര്ട്ട് സമര്പ്പിക്കും. രണ്ടു പ്രതികളുടേയും ജാമ്യാപേക്ഷ മറ്റന്നാള് കോടതി പരിഗണിക്കും.
