കൊച്ചി: പള്ളി പിടിക്കുന്നതുമായി ബന്ധപ്പെട്ട് പ്രതിസന്ധി അന്തമില്ലാതെ തുടരുമ്പോള് യാക്കോബായ ഓര്ത്തഡോക്സ് വിശ്വാസികള് തമ്മില് ബിഎസ്എഫ് ജവാന്റെ മൃതദേഹവുമായി ബന്ധപ്പെട്ടും തര്ക്കിച്ചത് വിവാദമായി. രാജസ്ഥാനില് വാഹനാപകടത്തില് മരിച്ച ബിഎസ്എഫ് ജവാന്റെ സംസ്ക്കാര ചടങ്ങില് മൃതദേഹം പള്ളിയുടെ അകത്ത് കയറ്റുന്നതുമായി ബന്ധപ്പെട്ടായിരുന്നു തര്ക്കം.
സൈനികന്റെ മൃതദേഹം പള്ളിയില് കയറ്റിയില്ലെന്ന് ആരോപിച്ച് യാക്കോബായ പ്രതിഷേധമാര്ച്ച് നടത്തി. രാജസ്ഥാനില് ബാര്മീറില് വെച്ച് ശനിയാഴ്ച രാവിലെ അപകടത്തില് പെട്ട് ബിഎസ്എഫ് ജവാന് ബിനോയ് ഏബ്രഹാമാണ് മരണമടഞ്ഞത്.
ബിനോയ് ഓടിച്ച മിലിട്ടറി ട്രക്ക് എതിരേ വന്ന ടൂറിസ്റ്റ് ബസുമായി കൂട്ടിയിടിക്കുകയായിരുന്നു. കഴിഞ്ഞ ദിവസം നാട്ടിലെത്തിച്ച മൃതദേഹം സൈനിക ബഹുമതികളോടെ ഇടവകയായ പിറവം വലിയപള്ളിയിലായിരുന്നു സംസ്ക്കരിച്ചത്. യാക്കോബായ വിഭാഗത്തിന്റെ പള്ളിയില് പ്രാര്ത്ഥനകള് നടത്തിയ ശേഷമായിരുന്നു മൃതദേഹം പള്ളിയില് എത്തിച്ചത്. മൃതദേഹം പള്ളിക്കുള്ളില കയറ്റണമെന്ന് കുടുംബം ആവശ്യം ഉന്നയിക്കുകയും പോലീസ് പള്ളിക്ക് അകത്ത് ഉണ്ടായിരുന്ന ഓര്ത്തഡോക്സ് വിഭാഗവുമായി ചര്ച്ച ചെയ്ത് അകത്ത് കയറ്റാന് അവസരം സൃഷ്ടിക്കുകയും ചെയ്തു.
എന്നാല് യാക്കോബായ വിശ്വാസികള് കൂടുതലായി പള്ളിക്കുള്ളില് പ്രവേശിക്കാന് വന്നപ്പോള് പോലീസ് ക്രമസമാധാന പ്രശ്നം ചൂണ്ടിക്കാട്ടി വിലക്കി. ഇതോടെ സൈനികന്റെ മൃതദേഹം പള്ളിക്കുള്ളില് കയറ്റിയില്ലെന്ന് ആരോപിച്ച് യാക്കോബായ വിഭാഗം പ്രതിഷേധ മാര്ച്ച നടത്തി. പൂര്ണ്ണ സൈനിക ബഹുമതികളോടെയാണ് ഭൗതീകശരീരം സംസ്ക്കരിച്ചത്.
