ശ്യാം പുഷ്ക്കരന്റെ തിരക്കഥയില് ഷാരൂഖിനെ നായകനാക്കി ആഷിക് അബു സംവിധാനം ചെയ്യുന്ന ഒരു സിനിമ എന്നു കേട്ടാല് എന്തു തോന്നും? എത്ര നല്ല നടക്കാത്ത സ്വപ്നം എന്നാവും ഉത്തരം. എന്നാല് അത് ചിലപ്പോള് സംഭവിച്ചേക്കുമെന്ന് സൂചന. ബോളിവുഡ് സൂപ്പര്താരം ഷാരൂഖ് ഖാന്റെ അടുത്ത സിനിമയുടെ പ്രഖ്യാപനത്തിന് വേണ്ടി ആരാധകര് ശ്വാസമടക്കിപ്പിടിച്ചാണ് കാത്തിരിക്കുമ്പോള് താരത്തെ മുംബൈയിലെ വീട്ടില് ചെന്ന് കണ്ടതിന്റെയും രണ്ടു മണിക്കറോളം സമയം ചര്ച്ച നടത്തിയതിന്റെയും വിവരങ്ങളാണ് പുറത്തുവരുന്നത്. കഴിഞ്ഞ രണ്ടു മാസമായി താരത്തിന്റെ പുതിയ സിനിമയുമായി ആരാധകര് കണ്ണുകഴച്ച് കാത്തിരിക്കുമ്പോള് കൂടിക്കാഴ്ചയുടെ വിവരങ്ങള് സാമൂഹ്യ മാധ്യമങ്ങളില് എത്തി.
ഷാരൂഖാന്റെ മന്നത്തിലെ വീട്ടിലെത്തിയാണ് മലയാളി സംവിധായകനും സംഘവും താരത്തെ സന്ദര്ശിച്ചത്. ആഷികിനൊപ്പം 'കുമ്പളങ്ങി നൈറ്റ്സി' ന്റെ നിര്മ്മാതാവ് ഷനീം സയാദും തിരക്കഥാകൃത്ത് ശ്യാം പുഷ്ക്കരനും ഉണ്ടായിരുന്നതായി പിങ്ക് വില്ല പുറത്തുവിട്ട റിപ്പോര്ട്ടില് പറയുന്നു. ഇതോടെ ഇവരെല്ലാം ഒരുമിക്കുന്ന ഒരു സിനിമ എന്ന രീതിയില് ഊഹാപോഹം പെരുകുകയാണ്. 2020 അവസാനത്തോടെ സിനിമ തുടങ്ങുമെന്നാണ് ഗോസിപ്പുകള്. അതേസമയം ഇതുവരെ ആരും ഇക്കാര്യത്തില് ഔദ്യോഗിക പ്രഖ്യാപനവും നടത്തിയിട്ടുമില്ല. സംഭവം ശരിയായാലും ഇല്ലെങ്കിലും കൂടിക്കാഴ്ചയുടെ ചിത്രങ്ങള് സാമൂഹ്യമാധ്യമങ്ങള് വഴി പുറത്തു വന്നിട്ടുണ്ട്. രണ്ടു മണിക്കൂറുകള് സംസാരിച്ചതായിട്ടാണ് വിവരം.
