ന്യൂഡല്ഹി: ബലാത്സംഗ കേസുകളില് കുറ്റവാളികള്ക്ക് ആറു മാസത്തിനുള്ളില് വധശിക്ഷ നടപ്പാക്കണമെന്ന് എന്നാവശ്യപ്പെട്ട് അനിശ്ചിതകാല നിരാഹാര സമരം അനുഷ്ഠിക്കുന്ന ഡല്ഹി വനിതാ കമ്മീഷന് അധ്യക്ഷ സ്വാതി മലിവാളിന്റെ ആരോഗ്യനില 13ാം ദിവസം വഷളായി. ഞായറാഴ്ച രാവിലെ അബോധാവസ്ഥയിലായ അവരെ ഡല്ഹിയിലെ ലോക് നായക് ജയ് പ്രകാശ് നാരായണ് ആശുപത്രിയിലേക്ക് മാറ്റി. ഈ മാസം മൂന്നു മുതലാണ് സ്വാതി മലിവാള് നിരാഹാര സമരം നടത്തിവരുന്നത്.
ഉത്തര്പ്രദേശിലെ ഉന്നാവോയില് 23കാരിയും ഹൈദരാബാദില് 26കാരിയായ വെറ്ററിനറി ഡോക്ടറും കൂട്ടബലാത്സംഗത്തിനിരയായി കൊല്ലപ്പെട്ട സാഹചര്യത്തിലാണ് നിയമം കര്ക്കശമായി നടപ്പാക്കണമെന്ന് ആവശ്യപ്പെട്ട് സ്വാതി നിരാഹാരം ആരംഭിച്ചത്. പുതിയ ദിശ നിയമം രാജ്യവ്യാപകമായി ഉടന് നടപ്പാക്കണമെന്ന് ആവശ്യപ്പെട്ട് ശനിയാഴ്ച മലിവാള് പ്രധാനമന്ത്രി നരേന്ദ്രമോഡിക്ക് കത്തയച്ചിരുന്നു. സ്ത്രീകള്ക്കെതിരായ അതിക്രമങ്ങളില് 21 ദിവസത്തിനകം വിചാരണ പൂര്ത്തിയാക്കി ശിക്ഷ വിധിക്കുന്നതാണ് ആന്ധ്രാപ്രദേശ് സര്ക്കാര് വെള്ളിയാഴ്ച കൊണ്ടുവന്ന പുതിയ നിയമം.
കഴിഞ്ഞ 12 ദിവസത്തെ നിരാഹാരം കൊണ്ട് തന്റെ ശരീരഭാരം എട്ടു കിലോ കുറഞ്ഞതായും ശാരീരികമായി കടുത്ത വേദനയും മറ്റ് അസ്വസ്ഥതകളും അനുഭവപ്പെടുന്നുണ്ടെന്നും മലിവാള് ചൂണ്ടിക്കാട്ടി. എങ്കിലും ദിശാ നിയമം രാജ്യം മുഴുവന് നടപ്പാക്കുന്നതുവരെ താന് അനിശ്ചിതകാല നിരാഹാരം തുടരുമെന്നും അവര് ചൂണ്ടിക്കാട്ടി.
സ്ത്രീകളുടെയും പെണ്കുട്ടികളുടെയും സുരക്ഷ ഉറപ്പാക്കുന്നതിനുള്ള തീരുമാനങ്ങള് എടുക്കാതെ പാര്ലമെന്റിന്റെ ശീതകാല സമ്മേളന കാലം അംഗങ്ങള്ഃ പാളാക്കി കളഞ്ഞു. ആന്ധ്ര സര്ക്കാരിന് ഈ ചരിത്രപരമായ തീരുമാനം എടുക്കാന് കഴിയുമെങ്കില്, എന്തുകൊണ്ട് കേന്ദ്രസര്ക്കാരിന് അതിനു കഴിയുന്നില്ലെന്നും അവര് ചോദിക്കുന്നു.
